23.02.2026 | 22:34
ՀՀ մի շարք հասցեներում էլեկտրաէներգիայի անջատումներ կլինեն
Ղազախական ցորենը ևս Ալեքսանյանի ընկերությունն է ներկրել․ տարանցման վճարումը մատակարարներն են կատարել
Տնտեսություն
13.11.2025 | 20:48
Ղազախական ցորենն Ադրբեջանի տարածքով ներկրել է «Բաղրամյան» ընկերությունը։ Այս մասին Factor.am-ի գրավոր հարցմանն ի պատասխան տեղեկացրել են ՀՀ Էկոնոմիկայի նախարարությունից։ Նշենք, որ այս ընկերությունը նաև ՌԴ-ից էր Ադրբեջանի տարածքով ցորեն բերել Հայաստան։
Ընկերությունը պատկանում է խոշոր գործարար, ՀՀԿ-ական նախկին պատգամավոր Սամվել Ալեքսանյանի ընտանիքին։
Թե՛ ռուսական, թե՛ ղազախական ցորենի ներկրման դեպքում տարանցման համար վճարումները կատարել են մատակարարող ընկերությունները։ Նախարարությունից հայտնել են, որ ՀՀ կառավարությունը որևէ վճար չի կատարել։ Միաժամանակ, գերատեսչությունից չեն պարզաբանել, թե ռուսական և ղազախական որ ընկերություններից են ցորենի խմբաքանակները ձեռք բերվել։ Առաջարկել են ճշտել «Բաղրամյան» ՍՊԸ-ից։
Factor.am-ը խնդրել էր նաև պարզաբանել, թե ինչպես է որոշումը կայացվել՝ օգտագործելու Ադրբեջանի տարածքը տարանցման համար և որ կողմի գաղափարն է դա եղել։ Նախարարությունից հստակ պատասխան չեն տվել։ «Ադրբեջանի տարածքով բեռների տեղափոխման որոշումը կայացվել է բանակցությունների արդյունքում»,- ասված է գրավոր պատասխանում։
Այս պատասխանից պարզ չի դառնում՝ սա օգոստոսի 8-ին Վաշինգտոնում ձեռք բերված պայմանավորվածությունների, թե՞ հոկտեմբերի 10-ին Դուշանբեում տեղի ունեցած հանդիպման արդյունք է։
Ղազախական ցորենով բեռնված գնացքը Հայաստան է ժամանել նոյեմբերի 8-ին՝ անցնելով Ղազախստանի, Ռուսաստանի, Ադրբեջանի և Վրաստանի տարածքներով։ Գնացքը տեղափոխել է շուրջ 1000 տոննա ցորեն։ Ղազախստանի գյուղատնտեսության նախարարությունը հայտնել էր, որ Ադրբեջանի տարածքով Հայաստան ուղարկված ցորենը 4-րդ կարգի է։
Դրանից առաջ Ադրբեջանի և Վրաստանի տարածքով՝ գնացքով, Հայաստան էր տեղափոխվել նաև ՌԴ-ից ձեռք բերված ցորենը՝ կրկին շուրջ 1000 տոննա։
Ղազախստանից և Ռուսաստանից ցորենի ներկրմանը նախորդել էր Ադրբեջանի նախագահ Իլհամ Ալիևի հայտարարությունն այն մասին, որ Ադրբեջանը հանել է բոլոր սահմանափակումները իր տարածքով դեպի Հայաստան բեռների տարանցման համար։ Հայաստանի վարչապետ Նիկոլ Փաշինյանն էլ իր հերթին հայտարարել է, որ Հայաստանն է հանել բոլոր սահմանափակումները իր տարածքով դեպի Ադրբեջան բեռների տարանցման համար։
Նարեկ Կիրակոսյան
