Զորախո՞ւմբ, թե՞ հումանիտար առաքելություն․ Թորոսյանի պնդումը հակասում է այլ պաշտոնյաների ավելի վաղ արած հայտարարություններին

Հանրային հեռուստաընկերության եթերում աշխատանքի և սոցիալական հարցերի նախարար Արսեն Թորոսյանը պնդել է, որ Հայաստանը Սիրիա զորախումբ է ուղարկել։ Եվ այս պնդումը հակասում է իշխանության ներկայացուցիչների՝ շարունակական հավաստիացումներին, թե դա զորախումբ չի եղել։

Թորոսյանն այս պնդումն անում էր այն համատեքստում, որ Հայաստանը ժամանակին կատարել է իր դաշնակցային պարտավորությունները ՀԱՊԿ-ի և Ռուսաստանի առջև, իսկ Ռուսաստանը չի կատարել իր պարտավորությունները, երբ Ադրբեջանը հարձակվել է Հայաստանի տարածքի վրա։

«․․․ Մենք հիշում ենք նույն ՀԱՊԿ-ի շրջանակներում մենք մեզ ինչպես ենք դրսևորել նույն ղազախական իրադարձությունների ժամանակ, ինչպես ենք զորախումբ ուղարկել Սիրիա, երբ մեզ ամբողջ Արևմուտքը մոտավորապես քննադատում էր», – ասել է Թորոսյանը։

Այս հայտարարությունն ուշագրավ է նրանով, որ այդ զորախմբի՝ Սիրիա գործուղվելու ժամանակ (2018-2019 թթ․) Հայաստանի բոլոր ոլորտային պաշտոնյաները հերքում էին այն պնդումը, թե դա զորախումբ է։ Ահա այդ պնդումներից մի քանիսը․

• Նիկոլ Փաշինյան․ «Սիրիայում զորախումբ չի տեղակայվում, այլ հումանիտար ականազերծման ու բժշկական առաքելություն», (2018 թ․ հոկտեմբերի 3),
• Դավիթ Տոնոյան․ «Հայ մասնագետների խումբը Սիրիայում մարտական խնդիրներ չի կատարելու, այլ զբաղվելու է բացառապես հումանիտար խնդիրներով: Հետևաբար, այն ունենալու է ոչ թե զորախմբի, այլ մասնագետների խմբի կարգավիճակ», (2018 թ․ սեպտեմբերի 11),
• Արմեն Գրիգորյան․ «Հայաստանը պաշտոնապես հայտարարել է, որ Սիրիայում իրականացնում է հումանիտար առաքելություն, և Հայաստանը շարունակելու է մնալ միայն հումանիտար առաքելության շրջանակում» (2019 թ․ փետրվարի 13):

Սա բավական աղմկահարույց թեմա էր, քանի որ ընդդիմությունը պնդում էր, որ ՀՀ ԶՈՒ ներկայացուցիչներին Սիրիա ուղարկելով՝ ՀՀ կառավարությունը ոչ միայն օրենք է խախտում, այլև Հայաստանը դնում է միջազգային բարդ իրավիճակում։

Գարիկ Հարությունյան