28.10.2026 | 10:34
Լիլիթ Ստեփանյանի փոխարեն ԱԺ պատգամավոր կդառնա Էդգար Առաքելյանը
Աշխարհի գավաթ․ Գաբրիել Սարգսյանը դուրս եկավ 5-րդ փուլ, Շանթ Սարգսյանը պարտվեց
13.11.2025 | 16:36
Հայաստանը ներկայացնող գրոսմայստեր Գաբրիել Սարգսյանը դուրս եկավ Հնդկաստանում ընթացող ՖԻԴԵ-ի շախմատի աշխարհի գավաթի խաղարկության 5-րդ փուլ:
Չորրորդ փուլի թայ-բրեյքում Գաբրիել Սարգսյանը արագ շախմատի 2 պարտիայում 1.5։0.5 հաշվով հաղթեց ԱՄՆ-ն ներկայացնող գրոսմայստեր Ավոնդեր Լիանգին, որի դեմ 2 դասական մրցախաղերն ավարտել էր ոչ-ոքի արդյունքով:
Հայաստանի մյուս ներկայացուցիչ, գրոսմայստեր Շանթ Սարգսյանը դուրս մնաց պայքարից: Հայ շախմատիստը թայ-բրեյքում արագ շախմատի 2 պարտիայում 0.5:1.5 պարտվեց գերմանացի գրոսմայստեր Ֆրեդերիկ Սվանեին, որը նախորդ խաղափուլում պայքարից դուրս էր թողել աշխարհի գործող չեմպիոն, հնդիկ Գուկեշ Դոմարաջուին:
Ավելի վաղ 5-րդ փուլի ուղեգիր էր նվաճել նաև Հայաստանի հավաքականի նախկին առաջատար, այժմ ԱՄՆ-ը ներկայացնող Լևոն Արոնյանը, որը 2 դասական պարտիաների արդյունքում հաղթել էր լեհ գրոսմայստեր Ռադոսլավ Վոյտաշեկին, իսկ ամերիկահայ Սամուել Սևյանը թայ-բրեյքում մրցում է իտալացի գրոսմայստեր Լորենցո Լոդիչիի հետ։
Հիշեցնենք, որ Հայաստանի ներկայացուցիչներից աշխարհի գավաթին մասնակցում էին նաև Ռոբերտ Հովհաննիսյանը և Կարեն Գրիգորյանը, որոնք դուրս են մնացել պայքարից։ Մրցաշարն անցկացվում է նոկաուտ ձևաչափով՝ 8 խաղափուլով: Յուրաքանչյուր փուլում մասնակիցները խաղում են երկու դասական պարտիա: Եթե գրանցվում է 1:1 հաշիվը, հաղթողը որոշվում է արագ և կայծակնային շախմատի թայ-բրեյքում:
