Միրզոյանը Դանիայի խորհրդարանում քննարկել է հայ-դանիական հարաբերությունների և տարածաշրջանային անվտանգության հարցեր

Կոպենհագենում ՀՀ արտաքին գործերի նախարար Արարատ Միրզոյանը հանդիպել է Դանիայի խորհրդարանի փոխխոսնակ Կարստեն Հյունգեի և արտաքին հարաբերությունների ու եվրոպական հարցերի հանձնաժողովների անդամների հետ։ Քննարկվել են Հայաստան–Դանիա հարաբերությունների զարգացումը, Հայաստան–ԵՄ գործընկերության խորացման օրակարգը, տարածաշրջանային կապուղիների ապաշրջափակման հնարավորությունները և խաղաղության հաստատման գործընթացը։

ԱԳՆ-ից տեղեկացնում են, որ Միրզոյանը կարևորել է Հայաստանի և Դանիայի խորհրդարանների միջև աճող համագործակցությունը, այդ թվում՝ Հայաստան–Նորդիկ-բալթյան երկրներ (NB8) ձևաչափով:

«Արարատ Միրզոյանը շեշտել է, որ այդ երկրներիհավատարմությունը ժողովրդավարությանը, իրավունքի գերակայությանը, մարդու իրավունքների պաշտպանության ու լավ կառավարմանը ոգեշնչում և աջակցում է Հայաստանին ժողովրդավարական բարեփոխումների, ինչպես նաև ԵՄ հետ գործընկերության խորացման ճանապարհին:

Նախարարը հիշատակել է 2025թ. մարտին ՀՀ Ազգային ժողովի կողմից ընդունված «Հայաստանի Հանրապետության՝ Եվրոպական միությանը միանալու գործընթաց սկսելու մասին» օրենքը, որն առաջին հերթին ՀՀ քաղաքացիների ձգտումների արտահայտումն էր քաղաքացիական նախաձեռնության միջոցով։

Անդրադառնալով օգոստոսի 8-ին Վաշինգտոնում ձեռք բերված պայմանավորվածություններին՝՝ նախարար Միրզոյանը նշել է, որ տարածաշրջանային կապուղիների ապաշրջափակումը փոխադարձ առավելություններ է ստեղծում ինչպես տարածաշրջանի երկրների համար, այնպես էլ դրանից անդին՝ նպաստելով Եվրոպայից դեպի Ասիա և հակառակը հաղորդակցությունների ցանցի ընդլայնմանը։ Արարատ Միրզոյանը ներկայացրել է Հայաստանի և Ադրբեջանի միջև Խաղաղության և միջպետական հարաբերությունների հաստատման մասին համաձայնագրի ստորագրման հարցում ՀՀ մոտեցումը»,- ասված է հաղորդագրությունում։

Ըստ գերատեսչության՝ անդրադարձ է կատարվել հումանիտար բնույթի հարցերին։