Խաղաղության ամրապնդման հարցում քաղաքացիական հասարակությունն ունի էական ներուժ. Միրզոյանը՝ Դանիայում

Դանիա աշխատանքային այցի ընթացքում ՀՀ արտգործնախարար Արարատ Միրզոյանը այցելել է Կուսակցությունների և ժողովրդավարության դանիական ինստիտուտ (DIPD) և հանդիպել քաղաքացիական հասարակության ներկայացուցիչների հետ։ Նախարարը ներկայացրել է Հայաստանի արտաքին քաղաքական առաջնահերթությունները, ժողովրդավարական զարգացման և խաղաղության հաստատման ուղղությամբ տարվող քայլերը, ինչպես նաև անդրադարձել է Հայաստան–ԵՄ գործընկերության և «Խաղաղության խաչմերուկ» նախաձեռնության նշանակությանը։ Այս մասին տեղեկացնում են ԱԳՆ-ից։

«Հայաստանը ժողովրդավարություն է, երիտասարդ, բայց ժողովրդավարական արժեքների և մարդու իրավունքների պաշտպանության հետևողական առաջմղման հարցում ամուր հանձնառությամբ ժողովրդավարություն, և մենք մեծապես շահագրգռված ենք համախոհ գործընկերությունների զարգացման հարցում»,- ընդգծել է նախարար Միրզոյանը:

«Արարատ Միրզոյանը հավելել է, որ ինչպես ժողովրդավարական զարգացման, այնպես էլ խաղաղության ամրապնդման հարցում քաղաքացիական հասարակությունն ունի էական ներուժ և անհրաժեշտ կարևոր դերակատարում:

Շարունակելով տարածաշրջանում խաղաղության թեման՝ նախարար Միրզոյանն ընգծել է, որ օգոստոսի 8-ին ԱՄՆ նախագահի ներգրավածությամբ Վաշինգտոնում ստորագրված եռակողմ հռչակագրով ձեռք բերված համաձայնություններն, այդ թվում՝ Հայաստանի և Ադրբեջանի միջև Խաղաղության համաձայնագրի նախաստորագրումը կարևոր հանգրվան են, այդ թվում՝ Հարավային Կովկասում և ավելի լայն տարածաշրջանում կայունության և փոխկապակցվածության զարգացման ուղղությամբ։

Այս համատեքստում նախարարը ներկայացրել է հաղորդակցությունների ապաշրջափակման հարցում Հայաստանի տեսլականն՝ ընդգծելով «Խաղաղության խաչմերուկ» նախաձեռնության և դրա բաղադրիչ «Թրամփի ուղի» ծրագրի գործնական նշանակությունը։

Անդրադարձ է կատարվել նաև հումանիտար բնույթի խնդիրների հասցեագրման ուղղությամբ տարվող աշխատանքերին:

Քննարկման ընթացքում հատուկ ուշադրություն է հատկացվել Հայաստանի և Եվրոպական միության միջև դինամիկ խորացող գործընկերությանն ու հավակնոտ օրակարգին, ինչպես նաև Հայաստան-Դանիա համագործակցության զարգացմանը՝ բոլոր մակարդակներում։ Մտքեր են փոխանակվել ժողովրդավարությունների դիմակայունության ամրապնդման ուղղությամբ փոխգործակցության հարցերի, այդ թվում՝ նաև հիբրիդային սպառնալիքների դեմ պայքարում առկա փորձին ու գործիքակազմին»,- մասնավորապես ասված է հաղորդագրությունում։

Ինստիտուտը ստեղծվել է Դանիայի խորհրդարանի կողմից 2010 թվականին՝ նպաստելու զարգացող երկրներում ժողովրդավարական կառավարման ամրապնդմանն՝ աջակցելով քաղաքական կուսակցություններին և բազմակուսակցական համակարգերին։