Բրիտանիան դադարեցրել է ԱՄՆ-ի հետ հետախուզական տվյալների փոխանակումը՝ նավերի վրա հարվածների պատճառով

Մեծ Բրիտանիան դադարեցրել է Կարիբյան ավազանում թմրանյութերի մաքսանենգության մեջ կասկածվող նավերի վերաբերյալ հետախուզական տվյալների փոխանակումը Միացյալ Նահանգների հետ։ Պատճառն այն է, որ Լոնդոնը նման նավերի վրա ամերիկյան հարվածները համարում է անօրինական և չի ցանկանում մասնակցել դրան։ Այս մասին հաղորդել է ամերիկյան CNN հեռուստաալիքը՝ հղում անելով տեղեկացված աղբյուրներին, փոխանցում է DW-ի ռուսական ծառայությունը։

Տարիներ շարունակ Մեծ Բրիտանիան, որը վերահսկում է Կարիբյան ավազանի որոշ տարածքներ, որտեղ տեղակայված են իր հետախուզական ծառայությունները, օգնել է ԱՄՆ-ին հայտնաբերել թմրանյութեր տեղափոխելու մեջ կասկածվող նավերը։ Այս տեղեկատվությունը թույլ է տվել ԱՄՆ առափնյա պահպանության ծառայությանը կանգնեցնել և ստուգել կասկածելի նավերը, իսկ խախտումների դեպքում կալանավորել նրանց անձնակազմին և առգրավել հայտնաբերված թմրանյութերը։

Այս տարվա սեպտեմբերին ԱՄՆ-ի կողմից Կարիբյան ավազանում նավակների վրա մահացու հարվածներից հետո Լոնդոնը մտահոգվել է այն հնարավորությունից, որ իր հետախուզական տվյալները կարող են օգտագործվել թիրախների ընտրության համար:

Լոնդոնի որոշումը նշանակալի խզում է իր ամենամոտ դաշնակցի և հետախուզական տվյալների փոխանակման գործընկերոջ հետ, նաև ընդգծում է Լատինական Ամերիկայում ԱՄՆ ռազմական գործողությունների օրինականության վերաբերյալ աճող կասկածները:

2025 թվականի սեպտեմբերի սկզբից ի վեր ԱՄՆ ռազմանավերը բազմիցս հարվածել են միջազգային ջրերում գտնվող նավերին, որոնք, ըստ ԱՄՆ-ի, կապված են վենեսուելական թմրակարտելների հետ։ Միաժամանակ, Միացյալ Նահանգները Վենեսուելայի ափերի մոտ տեղակայել է ռազմանավերի փոքր խումբ՝ վկայակոչելով թմրանյութերի ապօրինի շրջանառության դեմ պայքարը, իսկ Պուերտո Ռիկոյում տեղակայել կործանիչներ։

Սեպտեմբերի կեսերին Կարակասը Վենեսուելայի տարածքային ջրերում անցկացրել է «Կարիբյան ինքնիշխանություն 200» անվանումով զորավարժություններ։ Հոկտեմբերի սկզբին էլ Reuters-ը և The New York Times-ը (NYT) հայտնել են, որ ԱՄՆ նախագահ Դոնալդ Թրամփը հրաժարվել է Վենեսուելայի հետ հարաբերությունները կարգավորելու փորձերից։ NYT-ի տվյալներով՝ ԱՄՆ-ը մշակել էր հակամարտության սրման մի քանի սցենարներ, այդ թվում՝ Վենեսուելայի առաջնորդ Նիկոլաս Մադուրոյի իշխանությունից բռնի հեռացումը։

Լրատվամիջոցները հայտնում են, որ Կոլումբիայի նախագահ Գուստավո Պետրոն, իր հերթին, հրամայել է դադարեցնել հետախուզական տվյալների փոխանակումը ԱՄՆ հետախուզական գործակալությունների հետ, քանի դեռ Թրամփի վարչակազմը չի դադարեցրել Կարիբյան ավազանում թմրանյութերի ապօրինի շրջանառության մեջ կասկածվող նավերի դեմ ավիահարվածները: Նա պահանջել է, որ կոլումբիական բանակն անհապաղ խզի «հաղորդակցությունը և այլ համաձայնագրերը ԱՄՆ անվտանգության ուժերի հետ»։

Թարգմանությունը՝ Էմմա Չոբանյանի