20.05.2026 | 13:33
«Բոլորին դեմ եմ» կուսակցության «Մուկ տշելու» ակցիան. ՈՒՂԻՂ
Ադրբեջանի ՊՆ ղեկավարը Բոսնիա և Հերցեգովինայում ռազմական օբյեկտներ է այցելել
Քաղաքականություն
12.11.2025 | 21:45
Ադրբեջանի պաշտպանության նախարար, գեներալ-գնդապետ Զաքիր Հասանովը Բոսնիա և Հերցեգովինայի նախագահության անդամ Ժելկա Ցվիյանովիչի հետ հանդիպմանը փոխադարձ հետաքրքրություն ներկայացնող մի շարք հարցեր է քննարկել։
Ադրբեջանի ՊՆ-ի հաղորդմամբ՝ այցի շրջանակում Հասանովը եղել է Բոսնիա և Հերցեգովինայում գտնվող ԵՄ հրամանատարություն և թուրքական զորակազմ։ Նա հանդիպել է այդ երկրի պաշտպանության նախարար Զուկան Հելեզի հետ։ Հանդիպման ընթացքում կողմերը քննարկել են երկկողմ ռազմական համագործակցության զարգացման ներկա վիճակը և հեռանկարները։
Հանդիպումից հետո երկու երկրների պաշտպանության նախարարությունների միջև ստորագրվել է ռազմական համագործակցության ծրագիր, և նախարարների մասնակցությամբ տեղի է ունեցել մամուլի ասուլիս։
Բուտմիրի ռազմաբազայում նա հանդիպել է ԵՄ Միացյալ ուժերի հրամանատարության հրամանատար, գեներալ-մայոր Ֆլորին-Մարիան Բարբուի հետ։ Հանդիպմանը ադրբեջանական պատվիրակությանը մանրամասն տեղեկատվություն է տրամադրվել հրամանատարության գործունեության մասին, ընդգծվել է «Գործընկերություն հանուն խաղաղության» ծրագրի և «Գործառնական կարողությունների հայեցակարգի» շրջանակներում համագործակցության դրական փորձը, ինչպես նաև քննարկվել են մի շարք այլ հետաքրքրության հարցեր։
Հասանովը հանդիպել է նաև թուրքական զորախմբի ղեկավար, գնդապետ Մուստաֆա Չեթին Չելիքի հետ և ցավակցություն հայտնել նոյեմբերի 11-ին վրաց-ադրբեջանական սահմանին C-130 ռազմական տրանսպորտային ինքնաթիռի կործանման հետևանքով զինծառայողների մահվան կապակցությամբ։
Հասանովը այցելել է պաշտպանական արդյունաբերության գործարան և այլ ռազմական օբյեկտներ, ծանոթացել պայմաններին և արտադրական սարքավորումներին։
Թարգմանությունը՝ Էմմա Չոբանյանի
