Հնդկաստանում ընթացող ՖԻԴԵ-ի շախմատի աշխարհի գավաթում նոյեմբերի 11-ին կայացան չորրորդ փուլի առաջին հանդիպումները։
Հայաստանը ներկայացնող երկու գրոսմայստերները ոչ-ոքի արդյունքով ավարտեցին իրենց պարտիաները։
Շանթ Սարգսյանը սև խաղաքարերով մրցում էր գերմանացի գրոսմայստեր Ֆրեդերիկ Սվանեի հետ, որը նախորդ խաղափուլում պայքարից դուրս էր թողել աշխարհի գործող չեմպիոն, հնդիկ Գուկեշ Դոմարաջուին:
Գաբրիել Սարգսյանն էլ սև ֆիգուրներով խաղաղ դաշն կնքեց ԱՄՆ-ն ներկայացնող գրոսմայստեր Ավոնդեր Լիանգի հետ:
Հայաստանի հավաքականի նախկին առաջատար, այժմ ԱՄՆ-ը ներկայացնող Լևոն Արոնյանը սպիտակ ֆիգուրներով հաղթեց լեհ գրոսմայստեր Ռադոսլավ Վոյտաշեկին, իսկ ամերիկահայ Սամուել Սևյանը ոչ-ոքի խաղաց իտալացի գրոսմայստեր Լորենցո Լոդիչիի հետ։
Չորրորդ փուլի երկրորդ պարտիաները կանցկացվեն նոյեմբերի 12-ին։
Հիշեցնենք, որ Հայաստանի ներկայացուցիչներից աշխարհի գավաթին մասնակցում էին նաև Ռոբերտ Հովհաննիսյանը և Կարեն Գրիգորյանը, որոնք դուրս են մնացել պայքարից։ Մրցաշարն անցկացվում է նոկաուտ ձևաչափով՝ 8 խաղափուլով: Յուրաքանչյուր փուլում մասնակիցները խաղում են երկու դասական պարտիա: Եթե գրանցվում է 1:1 հաշիվը, հաղթողը որոշվում է արագ և կայծակնային շախմատի թայ-բրեյքում:
