Լուկաշենկոն սպառնացել է բռնագրավել Բելառուսում գտնվող լիտվական բեռնատարները

Բելառուսի ղեկավար Ալեքսանդր Լուկաշենկոն չի բացառել, որ երկրում գտնվող լիտվական բեռնատարները կարող են բռնագրավվել։ Ներկայում, նրա խոսքով, բոլոր լիտվական տրանսպորտային միջոցները, որոնք Բելառուսում էին, երբ Լիտվան փակել է սահմանը, հավաքվել են անցակետերում և «վերցվել հսկողության տակ», փոխանցում է Current time-ը։

«Ավտոմեքենաները հավաքվել են և գտնվում են հսկողության տակ։ Դրանք պահպանողները, կարծում եմ, օրական 120 եվրո են խնդրել։ Նրանք վճարել են հսկողության համար։ Սպասելու օրերի քանակը բազմապատկվում է 120 եվրոյով։ Վճարեք և վերցրեք մեքենաները և դրանց բեռը։ Եթե դա չարվի առաջիկա մի քանի օրերի ընթացքում, մենք որոշում կկայացնենք, ինչպես հայտարարել է Արտաքին գործերի նախարարությունը, մեր օրենքներին համապատասխան։ Սա կարող է ներառել այդ մեքենաների բռնագրավումը։ Նրանք չեն կարող պարզապես թափառել ճանապարհներին՝ 1100 կամ 1200 հսկայական բեռնատարներ»,- ասել է նա։

Բելառուսի պետական ​​մաքսային կոմիտեն նաև հայտարարել է, որ լիտվական բեռնատարները կկարողանան լքել կայանատեղիները միայն այն բանից հետո, երբ Լիտվան վերաբացի սահմանը։ Դրանք ներկայում կայանված են Կամեննի Լոգ, Բերեստովիցա, Բենյակոնի և Կոտլովկա անցակետերի մոտ։ Բեռնատարների վարորդները՝ 1100-ից 1500  անձ, ըստ Լուկաշենկոյի, կտեղափոխվեն անմիջապես սահմանային անցակետեր:

«Մենք մնացած ամեն ինչ կքննարկենք մոտ ապագայում՝ ԱՄՆ պատվիրակության հետ բանակցությունների ժամանակ։ Ես ուզում եմ հայտարարել՝ մենք վաղուց պատրաստ ենք բացել սահմանը։ Մենք այն չենք փակել։ Այն կարող է վերսկսել գործունեությունը մեր կողմից մի քանի ժամվա ընթացքում։ Սահմանապահները, ընդհանուր առմամբ, պատրաստ են դրան»,- հայտարարել է Լուկաշենկոն՝ դիմելով Լիտվայի իշխանություններին։

Լիտվան Բելառուսի հետ սահմանը փակել է հոկտեմբերի 27-ին և նախատեսում է այն փակ պահել առնվազն մինչև դեկտեմբերի սկիզբը։ Արգելքը սահմանվել է Բելառուսից տասնյակ օդապարիկների թռչելու հետևանքով, որոնք երբեմն գերազանցում էին մի քանի տասնյակը։

Օդապարիկների պատճառով Լիտվան ստիպված է եղել մի քանի անգամ փակել Վիլնյուսի օդանավակայանը (գտնվում է Բելառուսի սահմանից 25 կմ հեռավորության վրա)։

Ի պատասխան՝ Լուկաշենկոն հոկտեմբերի 31-ին հրամանագիր էր ստորագրել, որով արգելվում է Լեհաստանում և Լիտվայում գրանցված բեռնատարների, տրակտորների և կցորդների, ինչպես նաև Լեհաստանում գրանցված մարդատար մեքենաների տեղաշարժը Բելառուսի տարածքով։ Այդ պահից սկսած՝ Բելառուսի իշխանությունները պարզապես արգելել են այդ բեռնատարների ելքը երկրից։ Մինսկը ներկայում հրաժարվում է դրանք Վիլնյուսին վերադարձնել։ Տեղեկությունը հաստատել է Բելառուսի արտաքին գործերի նախարարության պաշտոնական ներկայացուցիչ Ռուսլան Վարանկովը։

Թարգմանությունը՝ Էմմա Չոբանյանի