Խուզարկել են Ուկրաինայի էներգետիկայի նախարարի ու Զելենսկիի ընկերոջ՝ Թիմուր Մինդիչի տները

Ուկրաինայի խորհրդարանի պատգամավոր Յարոսլավ Ժելեզնյակը հայտնել է, որ երկրի Ազգային հակակոռուպցիոն բյուրոն (NABU) խուզարկություններ է անցկացրել Ուկրաինայի արդարադատության և էներգետիկայի նախկին նախարար Գերման Գալուշչենկոյի տանը, ինչպես նաև «Էներգոատոմ»-ում: NABU-ն պաշտոնապես հայտարարել է, որ կոռուպցիայի դեմ պայքարի մասնագիտացված դատախազության հետ համատեղ իրականացնում է «մեծածավալ գործողություն էներգետիկ ոլորտում կոռուպցիան բացահայտելու համար», գրում է Current time-ը։

Քննիչների տվյալներով՝ կազմվել է «լայնածավալ կոռուպցիոն սխեմա՝ ազդելու ռազմավարական պետական ​​ձեռնարկությունների, մասնավորապես, «НАЭК Энергоатом» ԲԲԸ-ի վրա»։

«15 ամսվա աշխատանք և 1000 ժամ ձայնագրություն։ Մանրամասները կհրապարակվեն ժամանակին»,- գրել են NABU-ի ներկայացուցիչները։

Բացի այդ, ըստ ուկրաինական լրատվամիջոցների հաղորդագրությունների՝ նոյեմբերի 10-ի առավոտյան NABU-ն խուզարկություններ է անցկացրել գործարար, «Կվարտալ 95»-ի համասեփականատեր Թիմուր Մինդիչի տանը: Առայժմ հայտնի չէ՝ արդյո՞ք նրա գործը կապված է Գալուշչենկոյի հետ։

Նշվում է, որ Մինդիչը լքել է Ուկրաինան խուզարկությունից մի քանի ժամ առաջ:

Ուկրաինական լրատվամիջոցները Մինդիչին բնութագրել են որպես երկրի նախագահ Վլադիմիր Զելենսկիի ընկեր և «Կվարտալ 95» ընկերության համասեփականատերերից մեկը։

Հետաքննող լրագրող Միխայիլ Տկաչը հայտնել է, որ 2021 թվականին Զելենսկիի ծննդյան երեկույթը տեղի է ունեցել Մինդիչի բնակարանում՝ «Կվարդալ 95» խմբի անդամների հետ։ Զելենսկին այդ ժամանակ պարզաբանել էր, որ տարեդարձը նշել է իր սեփական բնակարանում, և որ Մինդիչի բնակարանը գտնվում է նույն շենքում։

Թարգմանությունը՝ Էմմա Չոբանյանի