Գեղակերտի դպրոցի ՔՊ-ական տնօրենի նկատմամբ ընտրվել է տնային կալանք

Երեկ ձերբակալված Վաղարշապատ համայնքի Գեղակերտ գյուղի դպրոցի տնօրեն Անուշ Համբարձումյանի նկատմամբ դատարանն ընտրել է խափանման միջոց տնային կալանքը և բացակայելու արգելքը։ Տեղեկությունը Factor TV-ի հետ զրույցում հաստատեցին Հակակոռուպցիոն կոմիտեից։

Հիշեցնենք՝ երեկ իրավապահ կառույցը հայտնել էր, որ իրականացված օպերատիվ-հետախուզական միջոցառումների արդյունքում ստացված տվյալների հիման վրա նախաձեռնվել է քրեական վարույթ բարեգործության արգելքը խախտելու դեպքի առթիվ. «Քրեական վարույթի շրջանակում ձերբակալվել է մեկ անձ, որի նկատմամբ կալանքը որպես խափանման միջոց կիրառելու միջնորդություն է ներկայացվել դատարան»։

Հիշեցնենք՝ օրեր առաջ Newday.am-ը տեսանյութ էր հրապարակել՝ նշելով, թե ՔՊ-ական Համբարձումյանն ընտրություններին զուգահեռ օգնություն է բաժանում։ Ավելի ուշ Համբարձումյանը ֆեյսբուքյան էջում պարզաբանում էր տարածել, թե «որոշ լրատվականներ, առանց հաշվի առնելու մարդու տարիներով կատարած բազմաթիվ բարեգործական կամավոր աշխատանքները, փորձում են այլ կերպ ներկայացնել, որը որևէ աղերս չունի իրականության հետ»։

«Հերթական աշխատանքը, որը ստիպված էի կատարել, քանի որ Կամրջակից ասացին, որ դոնոր կազմակերպություններին պետք է հաշվետվություն ներկայացնեն, իմ հրաժարվելու դեպքում 60 սովորող կզրկվեր տաք կոշիկներից և հագուստից։ Առաջնորդվելով մտքի և խղճի բարձր զգացումով, որ սոցիալական ծանր կացության մեջ գտնվող ծնողների համար սա անհրաժեշտություն է, համաձայնեցի»,- գրել էր Համբարձումյանը՝ կից ներկայացնելով, թե ինչ իրեր և առարկաներ է տարվա ընթացքում փոխանցել շահառուներին։

Անուշ Համբարձումյանը Վաղարշապատի ընտրություններին հանձնաժողովի նախագահ էր նշանակվել «Քաղաքացիական պայմանագիր» կուսակցության կողմից։

Ռոզա Վարդանյան