Հասարակություն
09.11.2025 | 15:34
FactorTV–ի տեղեկություններով՝ օրեր առաջ արտակարգ դեպք է տեղի ունեցել «Արմավիր» քրեակատարողական հիմնարկում. կալանավորն ածելիով վնասել է քրեակատարողական ծառայության աշխատակցին։
Մասնավորապես՝ օրեր առաջ ՔԿՀ երկու աշխատակիցները մտել են պատժախցում գտնվող կալանավորի մոտ և պահանջել իրենց փոխանցել ծածկոցը (պատժախցում գտնվող կալանավորը կամ դատապարտյալը ծածկոց ստանում է երեկոյան՝ քնելու համար, իսկ առավոտյան այն վերադարձնում ՔԿՀ աշխատակիցներին. սա օրենքով ամրագրված գործընթաց է- խմբ.), սակայն կալանավորը հրաժարվել է, ինչից հետո իր մոտ գաղտնի պահած ածելիով փորձել է վնասել ՔԿՀ աշխատակցի պարանոցը։ Խցում գտնվող մյուս աշխատակիցը, տեսնելով դա, կանխելու փորձ է կատարել, ինչի հետևանքով ածելիով հարված է ստացել ձեռքին։ Հարվածն այնքան խորն է եղել, որ պատռել է աշխատակցի երկշերտ հագուստը և խոր վերք թողել նրա ձեռքին։
Վնասվածք ստացած աշխատակցին արագ բուժօգնություն է ցուցաբերվել, իսկ դեպքի առթիվ նախաձեռնվել է քրեական վարույթ։
Ոչ աշխատանքային օրով պայմանավորված՝ FactorTV-ն վաղը կփորձի պաշտոնական մեկնաբանություններ ստանալ Քրեակատարողական ծառայությունից և Քննչական կոմիտեից։
Ռոզա Վարդանյան
