29.06.2026 | 14:53
Գալուզինը պնդում է, թե ԵՄ-ին Հայաստանի անդամակցության գործընթացը սկսվել է
FIA-ն պատրաստ է քննարկել Հայաստանի հետ համատեղ նախաձեռնությունների ձևավորման հնարավորությունները. Հաբիբ Տուրկի
Տնտեսություն
08.11.2025 | 20:00
Սաուդյան Արաբիայի մայրաքաղաք Ռիադում ՀՀ էկոնոմիկայի նախարար Գևորգ Պապոյանը հանդիպել է Formula 1-ի մայր կազմակերպություն հանդիսացող Միջազգային ավտոմոբիլային ֆեդերացիայի (FIA) զարգացման գծով գլխավոր տնօրեն Հաբիբ Տուրկիի հետ։ Կողմերը քննարկել են շարժունակության, ճանապարհային անվտանգության, քաղաքային տրանսպորտի և նորարարական ավտոտեխնոլոգիաների ոլորտներում համագործակցության հեռանկարները՝ պայմանավորվելով ձևակերպել համատեղ գործողությունների հստակ օրակարգ։ Այս մասին տեղեկացնում են ՀՀ էկոնոմիկայի նախարարությունից։
«Հանդիպման ընթացքում քննարկվել են Հայաստանի և FIA-ի (այդ թվում՝ Formula 1-ի) միջև հնարավոր համագործակցության ուղղությունները՝ շարժունակության և ճանապարհային անվտանգության քաղաքականության կատարելագործման, քաղաքային տրանսպորտային համակարգերի արդիականացման, ինչպես նաև ավտոմոբիլային և նորարարական տեխնոլոգիաների ներդրումային նախաձեռնությունների զարգացման ոլորտներում։
Գևորգ Պապոյանը ներկայացրել է Հայաստանի տնտեսական զարգացման ռազմավարական առաջնահերթությունները, խոշոր ենթակառուցվածքային ծրագրերը և տարածաշրջանային փոխկապակցվածության ամրապնդման տեսլականը՝ ընդգծելով միջազգային գործընկերների և մասնավոր հատվածի ներգրավման կարևորությունը։
Հաբիբ Տուրկին նշել է, որ FIA-ն պատրաստ է քննարկել Հայաստանի հետ համատեղ նախաձեռնությունների ձևավորման հնարավորությունները՝ ուղղված ոլորտային կարողությունների զարգացմանը և ենթակառուցվածքների կատարելագործմանը։
Կողմերը պայմանավորվել են շարունակել աշխատանքային կապը՝ նպատակ ունենալով ձևակերպել համագործակցության հստակ օրակարգ և մշակել առաջիկա քայլերը»,- ասված է հաղորդագրության մեջ։
