Ծառուկյանը միայնակ ցուցակ է գրում. թարմ «դեմքերի» առաջին անունները

«Բարգավաճ Հայաստան» կուսակցությունում ռեբրենդիգավորման լուրջ գործընթացներ են սկսվել: Կուսակցության թարմացումն անձամբ իրականացնում է Գագիկ Ծառուկյանը: Նա երեկ էլ ԱԺ-ում լրագրողների հետ զրույցում հայտարարեց, որ թարմացում անպայման լինելու է:

ԲՀԿ-ական պատգամավորները, սակայն, մտահոգված են: Factor.am-ի հետ մասնավոր զրույցներում նշեցին, որ ԲՀԿ-ն հեղափոխական էյֆորիա չունի և անկախ նրանից, որ թարմացումն անհրաժեշտ է, պետք է նաև հնաբնակներից լինեն ցուցակում:

Factor.am-ի աղբյուրների փոխանցմամբ՝ Ծառուկյանը ցուցակը միայնակ է կազմում և, ինչպես հայտնի է, գլխավորելու է ինքը:

Մեզ հայտնի դարձավ, որ ԲՀԿ-ի նախընտրական ցուցակում որպես թարմ դեմք լինելու է Արմեն Արզումանյանը: Նա միջազգայնագետ է, իսկ այս պահին զբաղեցնում է ՀՀ տրանսպորտի, կապի և տեղեկատվական տեխնոլոգիաների նախարարի տեղակալի պաշտոնը: Տեղեկացանք, որ նա Կրթության և գիտության նախարարության բարձրագույն որակավորման կոմիտեի նախկին նախագահ Լիլիթ Արզումանյանի քրոջ որդին է: Ա․ Արզումանյանը Factor.am-ի հետ զրույցում չբացառեց, որ կլինի ցուցակում, սակայն նշեց, որ վերջնական որոշում չկա և նախնական քննարկումներ են եղել:

Մյուս թարմ և երիտասարդ դեմքը փաստաբան է, որի անունը Ծառուկյանը դեռ չի հայտնել կուսակիցներին: Մեզ հայտնի դարձավ, որ ցուցակում լինելու է նաև Գագիկ Ծառուկյանի ֆինանսավորմամբ դրսում ուսում ստացած ուսանողներից մեկը, որն արդեն կրթվել և վերադարձել է Հայաստան:

Ցուցակում ԲՀԿ-ի հնաբնակաների լինել- չլինելու մասին Ծառուկյանը վերջնական որոշում չունի: Տեղեկությունների համաձայն՝ հնարավոր է, որ Նաիրա Զոհրաբյանը չլինի ցուցակում: ԲՀԿ-ի կուլիսներում ակտիվ խոսվում է այն մասին, որ Նաիրա Զոհրաբյանը նշանակվելու է դեսպան: Ավելին՝ իշխանության հետո թեթեւակի քննարկումներ եղել են, որ Զոհրաբյանին նշանակեն դեսպան: Սակայն նա դեմ է և պաշտոնապես հերքում է այս տեղեկությունները:

Մեզ հասած տեղեկությունների համաձայն՝ Զոհրաբյանի ու Ծառուկյանի հարաբերությունները լարվել են Երևանի քաղաքապետի ընտրությունների ժամանակ: Պատճառը եղել է այն, որ Նաիրա Զոհրաբյանը սուր ելույթներ է ունեցել, ինչը Գագիկ Ծառուկյանին դուր չի եկել:

ԲՀԿ-ական պատգամավորները ցուցակի մասին որևէ պաշտոնական մեկնաբանություն տալ չեն ցանկանում, քանի որ վերջնական որոշում չկա:

Հայկ Վարդանյան