Կյանքից հեռացել է ԱՄՆ նախկին փոխնախագահ Դիք Չեյնին

84 տարեկանում կյանքից հեռացել է ԱՄՆ փոխնախագահ Դիք Չեյնին։ Նա համարվում է Ամերիկայի ամենաազդեցիկ ժամանակակից փոխնախագահը և «ահաբեկչության դեմ պատերազմի» գլխավոր ճարտարապետը։ Չեյնիի մահվան մասին  հայտնել է նրա ընտանիքը, գրում է CNNը։

«Նրա 61 տարվա սիրելի կինը՝ Լիննը, դուստրերը՝ Լիզը և Մերին, ընտանիքի այլ անդամներ նրա հետ էին, երբ նա մահացել է։ Դիք Չեյնին մեծ և բարի մարդ էր, որն իր երեխաներին և թոռներին սովորեցրել է սիրել մեր երկիրը և ապրել քաջության, պատվի, սիրո, բարության և ձկնորսության կյանքով։ Մենք անչափ շնորհակալ ենք Դիք Չեյնիի կողմից մեր երկրի համար արված ամեն ինչի համար։ Եվ մենք անչափ օրհնված ենք, որ սիրել և սիրվել ենք այս ազնիվ հսկայի կողմից»,- ասել է ընտանիքի ներկայացուցիչը։

Հաղորդվում է, որ նա մահացել է թոքաբորբի, սրտի և անոթային հիվանդություններից առաջացած բարդություններից։

ԱՄՆ 46-րդ փոխնախագահը, որը 2001-ից 2009 թվականներին երկու ժամկետով ծառայել է հանրապետական ​​նախագահ Ջորջ Բուշ կրտսերի վարչակազմում, տասնամյակներ շարունակ եղել է Վաշինգտոնի բևեռացնող ազդեցիկ դեմքը։ Սակայն կյանքի վերջին տարիներին Չեյնին, դեռևս կոշտ պահպանողական լինելով, այնուամենայնիվ, մեծապես մեկուսացվել էր իր կուսակցությունից՝ նախագահ Դոնալդ Թրամփին ուղղված խիստ քննադատության պատճառով, որին նա անվանել է «վախկոտ» և հանրապետության համար ամենամեծ սպառնալիքը։

Դիք Չեյնին ծառայել է ԱՄՆ չորս նախագահների վարչակազմերում։ 1989-1993 թվականներին նա զբաղեցրել է ԱՄՆ պաշտպանության նախարարի պաշտոնը։ 2001-2009 թվականներին երկու ժամկետով զբաղեցրել է ԱՄՆ փոխնախագահի պաշտոնը Ջորջ Բուշ կրտսերի նախագահության օրոք։

Թարգմանությունը՝ Էմմա Չոբանյանի