Բաքվում շինծու գործերով նիստում ՀՀ-ին մեղադրել են, իբր, ագրեսիվ պատերազմ սանձազերծելու մեջ

Արցախի ղեկավարների, տարբեր պաշտոնյաների նկատմամբ հարուցված շինծու գործերով հերթական դատական նիստն է կայացել Բաքվի զինվորական դատարանում։ Ադրբեջանական լրատվամիջոցների հաղորդմամբ՝ նախորդ նիստում կողմերը հայտարարել էին, որ առարկություններ չունեն դատաքննության ավարտի վերաբերյալ և գոհ են ներկայացված ու հետազոտված ապացույցներից։

Ադրբեջանի գլխավոր դատախազի ավագ օգնական Վյուսալ Ալիևը հայտարարել է, որ դատական ​​գործընթացի ընթացքում ուսումնասիրված փաստաթղթերը հաստատում են, թե «Արցախի ղեկավարների հիմնական նպատակն էր՝ ցանկացած գնով հասնել Ադրբեջանից Ղարաբաղի շրջանի անջատմանը և այդ տարածքների օկուպացիային»։

Ընդգծվել է, թե, իբր, «Հայաստանի կողմից Ադրբեջանի դեմ սանձազերծված զինված հակամարտությունը պետք է որակվի որպես ագրեսիվ պատերազմ՝ միջազգային իրավունքի համաձայն», և 1988-1994 թվականների պատերազմի արդյունքում «օկուպացվել է Ադրբեջանի 12 քաղաք, 18 ավան և 895 գյուղ»:

Նշվել է, թե հայ գերիները, որոնք ներկայացվում են որպես հերոսներ, միջազգային իրավունքի համաձայն, իբր, «անձինք են, որոնք կատարել են ռազմական հանցագործություններ և մարդկության դեմ հանցագործություններ»։

Ներկայացվել են բաժիններ՝ կապված, իբր, «պատերազմի շարունակության, օկուպացված տարածքներում անօրինական բնակավայրերի ստեղծման, Ադրբեջանի ինքնիշխան տարածքներում իշխանության բռնի զավթման և անօրինական կառավարման ռեժիմի հաստատման, Ադրբեջանի  ռազմական զինանոցին վնաս հասցնելու, ինչպես նաև զենքի, զինամթերքի, ռազմական տեխնիկայի և այլ սարքավորումների տեղափոխման և տեղակայման, Ադրբեջանի տնտեսությանը դիտավորյալ վնաս հասցնելու և  ահաբեկչության ֆինանսավորման փաստերի հետ»։

Հաջորդ դատական նիստը նշանակվել է նոյեմբերի 6-ին։

Թարգմանությունը՝ Էմմա Չոբանյանի