Բաքվում Արցախի ղեկավարների շինծու գործերով նիստում դատախազներն անցել են ճառերին

Բաքվի զինվորական դատարանում այսօր շարունակվում է Արցախի ղեկավարների և այլ գերիների նկատմամբ հարուցված շինծու գործերով դատական նիստը։ Ադրբեջանական լրատվամիջոցների հաղորդմամբ՝ պետական մեղադրանքը պաշտպանող դատախազներին իրենց դիրքորոշումը ներկայացնելու հնարավորություն է ընձեռվել։

Գլխավոր դատախազի ավագ օգնական Վյուսալ Ալիևը հայտնել է, որ տարվա ընթացքում անցկացվել է մոտ 100 դատական ​​նիստ։ Փաստաթղթերն ու ապացույցներն ուսումնասիրվել են ավելի քան 500 ժամ։

«Հարցաքննվել են մեղադրյալները, տուժողները և վկաները։ Դատական ​​նիստերի ընթացքում վերանայվել են նախաքննության ընթացքում հավաքված ապացույցները, ինչպես նաև պաշտպանության կողմի ներկայացրած ապացույցները։ Որպես մեղադրանքի կողմ՝ մենք կարծում ենք, որ ներկայացված ապացույցների հիման վրա հաստատվել է մեղադրյալների մեղավորությունը 1988 թվականից ի վեր կատարված բազմաթիվ քրեական հանցագործությունների համար»,- հայտարարել է դատախազը։

Նշվել է, որ հայ գերիների  ցուցմունքներում ներկայացված մեղադրանքները կվերանայվեն։ Նորից կգնահատվեն «հանցագործությունները» և դրանցում հայ գերիների դերը, իբր, հաստատող ապացույցները։

Նշվել է, թե, ընդհանուր առմամբ, հայ գերիները մեղադրվում են, իբր, «հայկական պետության և նրա ստեղծած հանցավոր կազմակերպության կողմից կատարված հանցագործություններին ուղղակի կամ անուղղակի մասնակցության մեջ, որը բաժանված է 15 գլխի, նրանց գործունեության ժամանակահատվածներին համապատասխան՝ 1988 թվականից մինչև 2023 թվականի սեպտեմբերի 20-ը»։

Վյուսալ Ալիևը նշել է, որ մեղադրական եզրակացությունը բաղկացած է վեց մասից։

Դատական նիստը շարունակվում է։

Ավելի վաղ հաղորդել էինք, որ Բաքվում ավարտվել է Արցախի ղեկավարների շինծու գործերով դատաքննությունը։

Թարգմանությունը՝ Էմմա Չոբանյանի