Քաղաքականություն
29.10.2025 | 11:10
ԱՄՆ նախագահ Դոնալդ Թրամփը Հարավային Կորեա այցի ժամանակ ունեցած ելույթում կրկին հիշել է օգոստոսի 8-ին Սպիտակ տանը Հայաստանի և Ադրբեջանի ղեկավարներ Նիկոլ Փաշինյանի ու Իլհամ Ալիևի հետ հանդիպումը և խոսել հայ-ադրբեջանական խաղաղության գործընթացում իր դերակատարումից։ Նա դժվարությամբ է արտաբերել Ադրբեջան անվանումը, ինչն արձանագրել են տեսախցիկները։
«Ազեր-բայ-ջանը։ Եթե նայում եք՝ պարզապես նայեք դրան։ Այն տևել է, կարծեմ, 38 տարի, այնպես չէ՞։ Եվ նախագահ Պուտինը զանգահարեց ինձ ու ասաց. «Սա հիանալի է։ Մենք չկարողացանք կանգնեցնել այս պատերազմը»։ Այն տևել է 38 տարի։ Միլիոնավոր մարդիկ են մահացել։ Եվ մենք կարողացանք դա անել։ Եվ երկու երկրները եկան, սկսեցին այստեղից և աստիճանաբար մտերմանացան։ Մեկ ժամ անց նրանք արդեն գրկախառնվում էին՝ խաղաղության մեջ։ Դա զարմանալի էր։ Գեղեցիկ էր տեսնել, որ երկու շատ լավ երկրներ, երկու շատ լավ առաջնորդներ․․․ Մեկն իշխանության է 22 տարի, մյուսը՝ յոթ։ Եվ երկուսն էլ ասում էին՝ «Մեր ամբողջ քաղաքական կյանքում մենք միայն կրակել ենք մյուս կողմի մարդկանց վրա»։ Մենք արեցինք դա»,- հայտարարել է Թրամփը։
Հայաստանը Թրամփն իր ելույթում չի նշել։
Հավելենք, որ նախօրեին Ճապոնիայում Յոկոսուկա ռազմածովային բազայում տեղակայված USS George Washington ավիակրի վրա ամերիկացի զինծառայողների հետ հանդիպման ժամանակ ԱՄՆ նախագահը կրկին հայտարարել էր, որ դադարեցրել է ՀՀ-ի և Ադրբեջանի միջև հակամարտությունը։
Թարգմանությունը՝ Էմմա Չոբանյանի
