Հասարակություն
18.10.2025 | 00:04
Երևանի ավագանու «Քաղաքացիական պայմանագիր» խմբակցության անդամ Քրիստինե Վարդանյանն առաջարկում է Աջափնյակ վարչական շրջանի Սիլիկյան 5-րդ փողոցը (սկսում է Սիլիկյան 8-րդ փողոցից հասնում մինչև Սիլիկյան 13-րդ փողոց) անվանակոչել ՀԽՍՀ ժողովրդական արտիստ, նշանավոր հայ կոմպոզիտոր Ալեքսանդր Աճեմյանի անվամբ։ Նախագիծն ընդգրկվել է ավագանու հոկտեմբերի 23-ի նիստում։
Որոշման նախագծում նշվում է, որ փողոցն անվանափոխելու նախաձեռնությունը Հայաստանի կոմպոզիտորների միության նախագահ Արամ Սաթյանինն է․ այս տարի լրանում է Աճեմյանի մահվան հոբելյանական 100-րդ տարելիցը։
«Ալեքսանդր Աճեմյանը գրել է վեց սիմֆոնիա, հեղինակել է նաև «Հովվերգական սիմֆոնիետ», «Լորիկը», «Երևանը» սիմֆոնիաները, «Ռեքվիեմ», պոեմ-ռապսոդիա սիմֆոնիկ նվագախմբի համար (1957թ.), վոկալ-գործիքային շարք, ռոմանսներ, երգեր, երաժշտություն թատերական ներկայացումների և կինոնկարների համար: Նա հայ երաժիշտներից առաջինն է եղել, որ սիմֆոնիկ նվագախումբ է մտցրել մարդկային ձայն (սոպրանո), ինչպես օրինակ` նրա երկրորդ սիմֆոնիան: Հեղինակել է հուզական և քնարական բազում երգեր: 1971-87թթ դասավանդել է Երևանի կոնսերվատորիայում: 1975-ին արժանացել է ՀՀ պետական մրցանակի, 1965-ին՝ Հայաստանի արվեստի վաստակավոր գործչի, իսկ 1984-ին՝ ժողովրդական արտիստի կոչման»,- նշվում է որոշման նախագծում։
Ավագանու ՔՊ-ական անդամը մեկ այլ նախագիծ է ներկայացրել՝ Աջափնյակ վարչական շրջանի Սիլիկյան 6-րդ փողոցը (սկսում է Սիլիկյան 8-րդ փողոցից հասնում Սիլիկյան 11-րդ փողոց) նշանավոր հայ կոմպոզիտոր Արամ Սաթունցի անվամբ անվանակոչելու։ Այս առաջարկը ևս արվել է Սաթունցի որդու՝ կոմպոզիտորների միության նախագահ Արամ Սաթյանի կողմից։
«Արամ Սաթունցը ծնվել է Թուրքմենստանի Մերվ (այժմ՝ Մարի) քաղաքում, կոմպոզիտոր Աշոտ Սաթյանի եղբայրն է: 1931-41թթ եղել է Բաքվի, Անդիջանի, Գռոզնիի ժողովրդական գործիքների անսամբլի դիրիժոր: 1938-41թթ սովորել է Բաքվի կոնսերվատորիայի, 1944-47թթ՝ Երևանի Կոմիտասի անվան պետական կոնսերվատորիայի կոմպոզիտորական դասարաններում: 1941-44թթ մասնակցել է Երկրորդ համաշխարհային պատերազմին: 1945թ-ից աշխատել է «Հայֆիլմ» կինոստուդիայում՝ որպես երաժշտական բաժնի վարիչ, 1949-74թթ՝ Հայաստանի ռադիոյի և հեռուստատեսության պետական կոմիտեում՝ որպես երաժշտական խմբագրության գլխավոր խմբագիր, ապա երաժշտական ձևավորումների խմբագրության պատասխանատու խմբագիր: Գրել է «Ատամնաբույժն արևելյան» երաժշտական կատակերգությունը (ըստ Հ.Պարոնյանի, 1938թ.), «Զանգեզուր» սիմֆոնիկ պոեմը (1947թ.), «Վերածնված նաիրյան երկրի երգերը» վոկալ-սիմֆոնիկ շարքը (1979թ.), «Ժողովրդի սխրանքն անմահ է» կանտատը (1980թ.), «Տոնական պարային սյուիտ» փողային նվագախմբի համար (1967թ., Ալեքսանդրովի անվան մեդալ, 1974թ.), «Հայկական ֆանտազիա» (1960թ.) և «Օլիմպիական սպորտային պարային սյուիտ» (1980թ.)՝ էստրադային-սիմֆոնիկ նվագախմբի համար, կամերային-գործիքային երկեր (Սոնատ-պոեմ դաշնամուրի համար, 1946թ. և այլն), բազմաթիվ երգեր, ռոմանսներ, պարեր, քայլերգեր, երաժշտություն կինոնկարների և դրամատիկ ներկայացումների համար: Հրատարակվել է կոմպոզիտորի երգերի 3 ժողովածու (1969թ., 1975թ., 1983թ.): Կազմել և խմբագրել է մանկական երգերի ժողովածուներ: 1975թ. արժանացել է Հայաստանի արվեստի վաստակավոր գործչի, 1985թ.՝ ժողովրդական արտիստի կոչման»,- նշված է որոշման նախագծում։
Ի դեպ, «Հանրապետություն» խմբակցությունն էլ առաջարկում է Աջափնյակ և Մալաթիա-Սեբաստիա վարչական շրջանների Լենինգրադյան փողոցն անվանափոխել բարերար Քըրք Քըրքորյանի անվամբ։ Ի տարբերություն այս նախագծի, ավագանու ՔՊ-ական անդամի ներկայացրած նախագծերը չզեկուցվող են, այսինքն՝ դրանք նիստի ընթացքում չեն քննարկվի, միայն քվեարկության կդրվեն։
Արփի Հակոբյան
