Քաղաքականություն
13.10.2025 | 13:31
Տարածաշրջանում խաղաղության, կայունության, անվտանգության, բարգավաճման և համագործակցության ապահովմանն ուղղված նախաձեռնությունների ամրապնդումը կարևորագույն նշանակություն ունի բոլոր ոլորտներում համագործակցության զարգացման համար։ Ադրբեջանական լրատվամիջոցների հաղորդմամբ՝ Բաքվում ընթացող Ադրբեջանի, Ռուսաստանի և Իրանի կառավարությունների ներկայացուցիչների եռակողմ հանդիպման ժամանակ այս մասին հայտարարել է Ադրբեջանի փոխվարչապետ Շահին Մուստաֆաևը։
Նա նշել է, թե այս համատեքստում աճում է «3+3» տարածաշրջանային խորհրդատվական մեխանիզմի արդիականությունը։.
«Այս նախաձեռնությունը լրացնում է առկա երկկողմ և այլ համագործակցության ձևաչափերը, ամրապնդում է տարածաշրջանային անվտանգությունն ու կայունությունը, ինչպես նաև ստեղծում է տնտեսական աճի և առաջընթացի նոր հնարավորություններ»,- ասել է Մուստաֆաևը։
Ըստ նրա՝ անհրաժեշտ է խրախուսել երկրների միջև տնտեսական և առևտրային համագործակցությունը՝ հիմնված հավասարության և փոխադարձ օգուտի սկզբունքների վրա։ Պետք է շարունակել նաև աշխատանքը ներդրումային նախագծերի իրականացման համար բարենպաստ պայմաններ ստեղծելու ուղղությամբ։ Մուստաֆաևը հավելել է՝ Ադրբեջանը «հավատարիմ է բարիդրացիության, փոխըմբռնման և հավասար գործընկերության սկզբունքներին» ինչպես Իրանի, այնպես էլ Ռուսաստանի հետ հարաբերություններում։
Մուստաֆաևը նաև նշել է, որ 2028 թվականից Հյուսիս-Հարավ տրանսպորտային միջանցքով Ադրբեջանի տարածքով տարեկան կտեղափոխվի առնվազն հինգ միլիոն տոննա բեռ։ Նա հիշեցրել է, որ 2024 թվականի դեկտեմբերին Ադրբեջանը և Ռուսաստանը համաձայնագիր են ստորագրել այս երթուղով տարանցիկ երթևեկության զարգացման վերաբերյալ համագործակցության մասին։
Ադրբեջանցի պաշտոնյան տեղեկացրել է, որ Իրանի Աստարա քաղաքում գտնվող և Հյուսիս-Հարավ տրանսպորտային միջանցքի կարևոր բաղադրիչ հանդիսացող Հարավային բեռնատար տերմինալի շինարարությունը մոտենում է ավարտին։ Ադրբեջանի և Իրանի կառավարությունների միջև 2022 թվականի մարտին ստորագրված փոխըմբռնման հուշագրի համաձայն՝ Արաքս գետի վրայով անցնող նոր՝ Աղբենդ-Կալալա ավտոմոբիլային կամուրջը կդառնա տարածաշրջանի ռազմավարական տրանսպորտային ենթակառուցվածքների կարևոր մասը։ Արաքսի միջանցքի հիմնական բաղադրիչ հանդիսացող կամրջի շինարարությունը նախատեսվում է ավարտել այս տարվա վերջին, իսկ համապատասխան սահմանային և մաքսային ենթակառուցվածքների շինարարությունը կավարտվի հաջորդ տարվա առաջին եռամսյակում։ Հորադիզ-Աղբենդ ճանապարհի և երկաթուղու շինարարությունն էլ նախատեսվում է ավարտել հաջորդ տարվա ընթացքում։
Ի դեպ, Մուստաֆաևը նաև հայտնել է, որ Ադրբեջանի, Իրանի և Ռուսաստանի միջև եռակողմ հանդիպման մասնակիցները վաղը կանցկացնեն Հյուսիս-Հարավ միջազգային տրանսպորտային միջանցքի կարևոր ենթակառուցվածքային օբյեկտների համատեղ դիտարկում։ Ադրբեջանցի պաշտոնյան հայտարարել է, որ ներկայում Ադրբեջանի և Իրանի, ինչպես նաև Ադրբեջանի և Ռուսաստանի միջև գոյություն ունեն առանձին միավորումներ, որոնք հնարավորություն են տալիս իրականացնել էլեկտրաէներգիայի փոխանակում և առևտուր։
«Այս ոլորտում մեր համագործակցության օրակարգը ներառում է Ադրբեջանի, Իրանի և Ռուսաստանի էլեկտրացանցերի սինքրոնացման նախագիծ՝ եռակողմ ձևաչափով։ Տրանսպորտային ոլորտում մեր կողմից իրականացվող միջոցառումները պահանջում են մաքսային և սահմանային անցակետերի ենթակառուցվածքների միաժամանակյա բարելավում։ Այս համատեքստում մաքսային գործողությունների պարզեցումն ու թվայնացումը համագործակցության առաջնահերթ ոլորտներ են։ Հետևաբար, այսօրվա եռակողմ հանդիպումը կնվիրվի այս բոլոր հրատապ հարցերի քննարկմանը»,- հայտարարել է Ադրբեջանի փոխվարչապետը։
Թարգմանությունը՝ Էմմա Չոբանյանի
