06.10.2026 | 11:24
Դուրս եմ հանելու, հետո՝ դուրս շպրտեմ, հետո՝ խմբակային ցույց տանք, թե որը որից հետո ա․ Ռուբինյան․ ՏԵՍԱՆՅՈՒԹ
ԱՄՆ-ը կարող է Ուկրաինային Tomahawk հրթիռներ փոխանցել, եթե Ռուսաստանը չգնա պատերազմի կարգավորման․ Թրամփ
Քաղաքականություն
13.10.2025 | 11:35
ԱՄՆ նախագահ Դոնալդ Թրամփը հայտարարել է, որ Վաշինգտոնը կարող է Ուկրաինային փոխանցել հեռահար Tomahawk թևավոր հրթիռներ, եթե Ռուսաստանը չգնա պատերազմի կարգավորմանը, փոխանցում է Current time-ը։
Նա, միաժամանակ, ասել է, որ մտադիր է այդ հարցը քննարկել ՌԴ նախագահ Վլադիմիր Պուտինի հետ:
«Հնարավոր է՝ ես ստիպված լինեմ խոսել Ռուսաստանի հետ Tomahawk-ների մասին։ Արդյո՞ք նրանք ուզում են, որ Tomahawk-ները թռչեն իրենց ուղղությամբ: Ես այդպես չեմ կարծում: Կարծում եմ՝ արժե, որ խոսեմ Ռուսաստանի հետ այդ մասին։ Ես կարող եմ ասել՝ լսիր, եթե այս պատերազմը չկարգավորվի, ես նրանց Tomahawk-ներ կուղարկեմ»,- ասել է Թրամփը լրագրողներին Իսրայել ուղևորվելու ճանապարհին։
Նա նշել է, որ հրթիռների մատակարարումը կլինի «էսկալացիայի նոր մակարդակ»։ Թրամփի խոսքով՝ Ռուսաստանը պետք է համաձայնվի խաղաղ կարգավորմանը, քանի որ նրան պետք չեն Ուկրաինային Tomahawk-ի մատակարարումները։ Թրամփը հավելել է, թե կարծում է, որ Պուտինը կհամաձայնվի դրան, եթե ոչ՝ դա կարող է վատ ավարտ ունենալ իր համար։
Եթե որոշում կայացվի, ԱՄՆ-ը հրթիռներն ուղղակիորեն չի վաճառի Ուկրաինային, այլ ՆԱՏՕ-ի դաշնակիցներին, որոնք կարող են դրանք փոխանցել Կիևին։
Հոկտեմբերի 12-ին էլ Fox News-ին տված հարցազրույցում Ուկրաինայի նախագահ Վլադիմիր Զելենսկին հայտարարել էր, որ եթե Միացյալ Նահանգներն իր երկրին տրամադրի Tomahawk հրթիռներ, դրանք չեն օգտագործվի քաղաքացիական բնակչության վրա հարձակվելու համար:
«Միայն ռազմական թիրախներ։ Մենք երբեք չենք հարձակվի դրանցով քաղաքացիական բնակչության վրա»,- ասել է նա։
Անցյալ շաբաթ Դոնալդ Թրամփը հայտարարել էր, որ «որոշ իմաստով» որոշում է կայացրել այդ հրթիռները Կիևին փոխանցելու վերաբերյալ։ Այնուամենայնիվ, նա նշել էր, որ նախ կցանկանար իմանալ, թե ինչ է Ուկրաինան «ծրագրում անել դրանցով»։
«Ո՞ւր են դրանք ուղարկելու։ Կարծում եմ՝ ես պետք է այդ հարցը տամ»,- ասել էր նա։
Պուտինն էլ հայտարարել է, որ Tomahawk թևավոր հրթիռների՝ Կիևին փոխանցումը «ոչինչ չի փոխի մարտադաշտում»։ Նա պնդել է, թե Ռուսաստանի ՀՕՊ համակարգը հարմարվել է ATACMS հրթիռներին և սկսել է դրանք որսալ, սակայն հրթիռների մատակարարումը սրում է Մոսկվայի և Վաշինգտոնի միջև հարաբերությունները։
Թարգմանությունը՝ Էմմա Չոբանյանի
