20.12.2025 | 20:00
100,000 ռուբլի՝ ՀՀ-ում լրտեսության համար․ ՌԴ քաղաքացիները Հայաստանում տվյալներ են հավաքել․ ՏԵՍԱՆՅՈՒԹ
Վառվում է Նուբարաշենի աղբավայրը. ՏԵՍԱՆՅՈՒԹ
Տեսանյութեր
10.10.2025 | 11:12
Երևանի կենտրոնից ընդամենը մի քանի կիլոմետր հեռավորության վրա գտնվող Հայաստանի ամենամեծ աղբավայրում կրկին հրդեհ է բռնկվել։ Վաղ առավոտից թանձր ծուխը տարածվում է մայրաքաղաքի վրա․ ինչ ծավալներ է հրդեհն ընդգրկում՝ այս պահի դրությամբ պաշտոնական հաղորդագրություն դեռ չկա։
Երևանի քաղաքապետարանից Factor.am-ին փոխանցեցին, որ հրդեհի հիմնական օջախն արդեն մարվել է։ Հաղորդվում է, որ կեսգիշերից աղբավայրի տարածք բեռնատարներով հող է տեղափոխվել՝ տարածքը ծածկելու համար։
Հիշեցնենք, որ աղբավայրում օգոստոսի 8-ի ուշ երեկոյան կրկին հրդեհ էր բռնկվել։ Այն ժամանակ ՆԳՆ փրկարար ծառայությունից հայտնել էին, որ հրդեհի մակերեսը կազմել է մոտ հինգ հեկտար։ Երևանի քաղաքապետի խորհրդական Կամո Արեյանը Factor TV-ի հետ զրույցում հայտնել էր, որ շուրջ 75 տարի գործող այս աղբավայրի խնդիրը լուծման կարիք ունի։ Ըստ Արեյանի՝ ճանապարհը մեկն է՝ պետություն, համայնք, մասնավոր համագործակցությամբ աղբի վերամշակման գործարանի ստեղծում։
Համայնքային իշխանությունը բազմիցս խոստացել էր կոնսերվացնել աղբավայրը, դրա փոխարեն 2024-ին սկսել ժամանակակից ստանդարտներով աղբավայրի կառուցումը։ Սակայն աղբի վերամշակման գործարան կառուցելու մրցույթը հայտարարվել է ընդամենը ութ ամիս առաջ։ Կառույցից տեղեկացնում են՝ դեռ արդյունքներ հրապարակել չեն կարող, սպասում են կազմակերպությունների, որոնք պատրաստ կլինեն իրականացնել այդ ներդրումային ծրագիրը մայրաքաղաքում։
Անի Թամրազյան
Մանրամասները՝ տեսանյութում։
