Ռուսական զորքերը ԱԹՍ-ներով հարվածել են Խարկովին․ կան տուժածներ

Ռուսական զորքերը հոկտեմբերի լույս 6-ի գիշերը անօդաչու թռչող սարքերով հարվածներ են հասցրել Խարկովին, որի հետևանքով վիրավորվել է չորս մարդ։ Այս մասին հայտնել է Խարկովի տարածաշրջանային ռազմական վարչակազմի ղեկավար Օլեգ Սինեգուբովը, փոխանցում է Current time-ը։

Ուկրաինայի ​​արտակարգ իրավիճակների պետական ծառայությունը հայտնել է, որ քաղաքի Նովոբավարսկի շրջանում հրդեհներ են բռնկվել, վնասվել է մեկ շենք։ Վնասվել են նաև մասնավոր տներ, պահեստներ, ավտոտնակներ և մեքենաներ։

Բացի այդ, ռուսական ուժերը հարվածել են Օդեսայի մարզում գտնվող քաղաքացիական արդյունաբերական օբյեկտին. ոչ ոք չի տուժել, հայտնել է ռազմական վարչակազմի ղեկավար Օլեգ Կիպերը։

Ուկրաինայի ռազմաօդային ուժերի հաղորդմամբ՝ Ռուսաստանը հոկտեմբերի լույս 6-ի գիշերը հարձակվել է 116 անօդաչու թռչող սարքերով, և ժամը 9:00-ի դրությամբ՝ դրանցից 83-ը «խոցվել կամ ճնշվել» են երկրի հյուսիսում։

Նախօրեին Ուկրաինայի ռազմաօդային ուժերը հայտնել էին զանգվածային համակցված հարձակման մասին, մոտավորապես, 500 անօդաչու թռչող սարք և ավելի քան 50 հրթիռ էր արձակվել։ Զոհվել էր հինգ խաղաղ բնակիչ։

Խարկովը պարբերաբար ենթարկվում է ռուսական բանակի հարձակումներին։ Ուկրաինայի իշխանությունները և միջազգային կազմակերպությունները քաղաքացիական ենթակառուցվածքների և քաղաքացիական բնակչության վրա հարձակումները որակում են որպես Ռուսաստանի կողմից կատարված ռազմական հանցագործություններ, մինչդեռ Ռուսաստանի իշխանությունները հերքում են դա՝ պնդելով, որ հարձակումներն ուղղված են ռազմական թիրախների դեմ։

Թարգմանությունը՝ Էմմա Չոբանյանի