Ավետ Բաբայանը արձակուրդից վերադարձել է

Երևանի քաղաքապետարանի աշխատակազմի հասարակական կարգի պահպանության ծառայության պետ Ավետիք Բաբայանն արձակուրդից վերադարձել է աշխատանքի: Այս մասին Factor.am-ի հարցին ի պատասխան հայտնեցին Երևանի քաղաքապետարանի լրատվության վարչությունից:

Հիշեցնենք, որ Բաբայանը արձակուրդ էր մեկնել Տիգրան Ավինյանի որոշմամբ` խիստ նկատողություն ստանալուց հետո: Մինչ այդ, Երևանի քաղաքապետի նախկին խոսնակ, լրագրող Հակոբ Կարապետյանը ֆեյսբուքյան գրառմամբ հայտնել էր, թե Ավետիք Բաբայանից ստացել է հայհոյախառն ու սպառնալից հաղորդագրություններ, ինչից հետո իր վրա հարձակում է տեղի ունեցել։ Նախքան այդ միջադեպը Կարապետյանը ֆեյսբուքում, մասնավորապես, գրել էր․ «Նեղմիտ ու ոչ կոմպետենտ կառավարիչներ ունենալը սա է․ կյանքդ դարձնում են ամենօրյա պայքար կաստում-շլվարավոր տգետների արտադրած թյուրիմացության դեմ»։ Կարապետյանի այս գրառումը կապված էր մի միջադեպի հետ, երբ Երևանի քաղաքապետարանի հասարակական կարգի պահպանության ծառայության աշխատակիցները հասարակական տրանսպորտում ուղեվարձը չվճարած քաղաքացիներին տուգանելու ժամանակ տուգանել էին նաև ուղեվարձը վճարած ուղևորի։ Վերջինը հետագայում ապացուցել էր, որ վճարել է, ինչից հետո Ավետ Բաբայանը զանգահարել և ներողություն էր խնդրել տվյալ ուղևորից։

Այս ամենը տեղի էր ունեցել լրատվամիջոցի անդրադարձից հետո։

Նշենք նաև, որ Ավետիք Բաբայանը վկայի կարգավիճակով հարցաքննվել է ֆիզիկական ներգործության հատկանիշներով նախաձեռնված քրեական վարույթի շրջանակում:

Արփի Հակոբյան