03.10.2026 | 22:08
Հայաստանի հավաքականը ժամանել է Պոդգորիցա
Անկարան հայտնել է, որ հետաքննում է թուրքական ԶԼՄ-ներում Ադրբեջանի մասին տարածվող «ապատեղեկատվության դեպքերը»
Քաղաքականություն
01.10.2025 | 18:19
Բաքուն պնդում է, թե վերջին օրերին որոշ թուրքական լրատվամիջոցներ և սոցիալական ցանցեր համակարգված կերպով տարածում են ապատեղեկատվություն Ադրբեջանի մասին։ Թուրքիայի կառավարության աղբյուրը ադրբեջանական իշխանամերձ APA գործակալությանը հայտնել է, որ հարցը հետաքննվում է երկրի պաշտոնական մարմինների կողմից։
«Հետաքննություններն ու վերլուծական աշխատանքներն արդեն սկսվել են։ Այս հարցի շուրջ կարծիքների փոխանակում է տեղի ունեցել նաև ադրբեջանական կողմի հետ։ Նման հրապարակումները ոչ այլ ինչ են, քան նյուանսներ, որոնք ի վիճակի չեն հարված հասցնել Թուրքիայի և Ադրբեջանի միջև եղբայրական հարաբերություններին»,- նշել է աղբյուրը։
Հավելենք, որ նախօրեին էլ Ադրբեջանում Թուրքիայի դեսպանատունն էր դիրքորոշում հայտնել վերջերս թուրքական լրատվամիջոցներում Ադրբեջանի մասին տարածվող «կեղծ լուրերի» վերաբերյալ։
Օրերս թուրքական Yeniakit-ը և մի շարք այլ լրատվամիջոցներ հայտնել էին, որ Ադրբեջանը հայտարարել է, թե կհրաժարվի 2026 թվականի «Եվրատեսիլ» երգի մրցույթին մասնակցությունից, եթե Իսրայելին արգելեն մասնակցել։ Ըստ թուրքական աղբյուրների՝ Ադրբեջանը հայտնել է, որ այդ դեպքում կբոյկոտի մրցույթը։ Այս տեղեկությունը բուռն քննարկվում էր սոցցանցերի թուրքական տիրույթում։
Այս լուրերի տարածումից հետո ադրբեջանական իշխանամերձ լրատվամիջոցները գրել էին, որ թուրքական որոշ լրատվամիջոցների կողմից տարածված տեղեկությունն իրականությանը չի համապատասխանում։ Այժմ էլ թուրքական աղբյուրները լուսանկարներ են տարածում, թե ՄԱԿ-ում Իսրայելի վարչապետ Բենիամին Նեթանյահուի ելույթին ծափահարել են Ադրբեջանի ԱԳ նախարար Ջեյհուն Բայրամովն ու երկրի առաջին տիկին Մեհրիբան Ալիևան։
Իրականում, ըստ տարբեր աղբյուրների, Ադրբեջանի պատվիրակության անդամներ, ամեն դեպքում, ներկա են եղել Նեթանյահուի ելույթին, քանի որ այլ լուսանկարներ ևս տարածվում են։
Թարգմանությունը՝ Էմմա Չոբանյանի
