31.05.2026 | 19:16
Մեզ սարքում են ՌԴ-ի թշնամի, տանում Ուկրաինայի ճանապարհով․ Քոչարյան․ ՏԵՍԱՆՅՈւԹ
Չեխիան արգելել է չհավատարմագրված ռուս դիվանագետների մուտքը երկիր
Քաղաքականություն
30.09.2025 | 20:44
Չեխիայի կառավարությունն արգելել է ազգային հավատարմագրում չունեցող՝ Ռուսաստանի դիվանագիտական և ծառայողական անձնագրերով քաղաքացիների մուտքը: Այս մասին հայտարարել է Չեխիայի արտաքին գործերի նախարար Յան Լիպավսկին X սոցիալական ցանցում, գրում է Current time-ը։
«Այս միջոցառումը գործում է միջազգային օդանավակայաններում։ Դիվերսիոն գործողությունների թիվն աճում է, և մենք ռիսկի չենք դիմի՝ ընդունելով դիվանագիտական քողի տակ գործող գործակալների։ Մենք օրինակ ենք ծառայում այլ երկրների համար, և ես կշարունակեմ պնդել Շենգենյան մակարդակում ամենախիստ միջոցառումների կիրառման վրա։ Մենք կպաշտպանենք Չեխիայի Հանրապետությունը», – գրել է նա։
2023 թվականի նոյեմբերին Չեխիայի Հանրապետությունը առաջարկել էր սահմանափակել ռուս դիվանագետների տեղաշարժը ԵՄ-ի ներսում: Financial Times-ը որպես այս սահմանափակումների ներդրման պատճառ նշել էր ռուսական հետախուզության ենթադրյալ գործակալների դեմ պայքարը։
Չեխիայի իշխանությունները կարծում են, որ ռուս դիվանագետները պետք է ստանան վիզաներ և բնակության թույլտվություններ, որոնք թույլ կտան տեղաշարժվել միայն ընդունող երկրի ներսում, այլ ոչ թե ամբողջ Շենգենյան տարածքում: Նախաձեռնության հեղինակները նաև առաջարկել են վիզաների և բնակության թույլտվությունների համար դիմելիս ընդունել միայն ռուս դիվանագետների կենսաչափական անձնագրերը, քանի որ դրանք ավելի դժվար է կեղծել։
Լեհաստանն էլ դարձել է առաջին եվրոպական երկիրը, որը սահմանել է ռուս դիվանագետների տեղաշարժի սահմանափակումները: 2024 թվականի մայիսից սկսած՝ Ռուսաստանի դեսպանատան աշխատակիցները կկարողանան ազատորեն տեղաշարժվել միայն Մազովեցկիե վոյեվոդության մայրաքաղաքային շրջանում: Այս սահմանափակումները վերաբերում են բոլոր ռուս դիվանագետներին, բացառությամբ Լեհաստանում Ռուսաստանի դեսպան Սերգեյ Անդրեևի:
Թարգմանությունը՝ Էմմա Չոբանյանի
