Ռուզաննա Մուրադյանը պատգամավորական մանդատից հրաժարվել է Սերժ Սարգսյանի ցուցումով. պատճառը հայտնի է

ՀՀԿ-ական պատգամավոր Ռուզաննա Մուրադյանը մանդատից հրաժարվել է Սերժ Սարգսյանի ցուցումով: Այս մասին Factor.am-ի հետ ունեցած մասնավոր զրույցներում փոխանցեցին ՀՀԿ-ական պատգամավորները: Նույն աղբյուրների փոխանցմամբ՝ պատճառը եղել է այն, որ Մուրադյանը հոկտեմբերի 22-ին գումարված Ազգային ժողովի արտահերթ նիստում կողմ էր քվեարկել «Ընտրական օրենսգրքի» փոփոխությունների փաթեթին:

«Սերժ Սարգսյանի մակարդակով ասվել է՝ դիմումդ գրի, գնա»,- Factor.am-ի հետ զրույցում ասաց ՀՀԿ-ականներից մեկը:

Ու թեև այդ փոփոխությունների փաթեթը չի ընդունվել, այնուհանդերձ Մուրադյանի քայլը ՀՀԿ-ում համարել են «դավաճանություն»: Ուշագրավը նաև այն է, որ ՀՀԿ-ից կողմ էր քվեակրել նաև Հակոբ Հակոբյանը (Կիլիկիայի Հոկոբ), սակայն նրան որևէ բան չի ասվել մանդատից հրաժարվելու հետ կապված: ՀՀԿ-ականները սա կապեցին այն հանգամանքի հետ, որ Հակոբյանը վաղուց էր լքել իրենց ճամբարը:

Factor.am-ը փորձեց թեմայի շուրջ զրուցել նաև Ռուզաննա Մուրադյանի հետ: Այն պահից, երբ ԱԺ նախագահ Արա Բաբլոյանը հայտարարեց, որ պատգամավորը հրաժարվում է մանդատից, մինչև ուշ երեկո Ռուզաննա Մուրադյանը չպատասխանեց մեր զանգերին:

Այս իրադարձությունն այսօր լրատվամիջոցների քննարկման առանցքում չհայտնվեց, քանի որ վարչապետի պաշտոնակատար Նիկոլ Փաշինյանը իր ելույթում մեկ այլ ուշագրավ հայտարարություն արեց: Ըստ նրա՝ շուտով ձերբակալվելու է ԱԺ պատգամավոր, որը ներգրավված է կոռուպցիոն սկանդալներում:

«Ազգային ժողովի կանոնակարգ, Սահմանադրական օրենքի 155-րդ հոդվածի համաձայն, եթե հրաժարականի հրապարակումից հետո՝ 1 շաբաթվա ընթացքում, պատգամավորը գրավոր դիմումով հետ է վերցնում հրաժարականի մասին իր դիմումը, ապա Ազգային ժողովի նախագահն այդ մասին հանդես է գալիս հայտարարությամբ, եթե հետ չի վերցնում հրաժարականի մասին իր դիմումը, ապա նրա լիազորությունների դադարման մասին կազմվում է արձանագրություն, որը ստորագրում և հրապարակում է Ազգային ժողովի նախագահը։

Հայկ Վարդանյան