Անհնար է, որ քաղաքապետարանն ու ԿԳՄՍՆ-ը չհամագործակցեն. Լևոն Հովհաննիսյան․ ՏԵՍԱՆՅՈՒԹ

«Ես կարծում եմ, որ վերջնական իմպլեմենտացիոն պրոցեսը ԿԳՄՍ նախարարության հետ, իհարկե, կքննարկենք և կհասկանանք՝ ինչ կարգով ենք այս ամենն անում»,- այս մասին Factor TV-ի հետ հարցազրույցում ասաց Երևանի փոխքաղաքապետ Լևոն Հովհաննիսյանը՝ անդրադառնալով դպրոցներում աշակերտների կողմից սմարթֆոնների օգտագործման արգելքին կամ սահմանափակմանը։

Ինչո՞ւ նախապես չեն քննարկել՝ հաշվի առնելով այն, որ դասագրքերում կան QR կոդեր, որոնք հնարավոր է սքանավորել միայն սմարթֆոնով՝ հարցրինք փոխքաղաքապետին։
«Նախապես քննարկելու և չքննարկելու խնդիր չկա, դասագրքերում, այո՛, առկա են որոշակի QR կոդեր որոշ թեմաներով։ Բայց դասագրքերն օգտագործում են ինչպես տանը, այնպես էլ դպրոցում, այսինքն՝ այստեղ կարող է լինել տարանջատում։ Ինչ վերաբերում է Երևանի քաղաքապետարանին՝ ուսումնասիրել ենք միջազգային փորձը, նաև որպեսզի վստահ լինենք, որ այն արդյունքին ենք հասնելու, որը պատկերացնում ենք»,- ընդգծեց Հովհաննիսյանը։

Դիտարկմանը՝ ստացվում է, որ ԿԳՄՍ նախարարությունն ու Երևանի քաղաքապետարանը չեն համագործակցում միմյանց հետ, Հովհաննիսյանն արձագանքեց։

«Մենք բազմաթիվ թեմաներով ենք համագործակցում, անհնար է, որ չհամագործակցենք։ Այն փուլն է, որ մենք պետք է համագործակցենք ԿԳՄՍՆ-ի հետ և հասկանանք՝ ինչ ենք անում»,- նշեց փոխքաղաքապետը։

Հիշեցնենք, որ երեկ Երևանի քաղաքապետարանի գործակարգավարական նիստի ժամանակ հայտնի դարձավ, որ քաղաքապետարանն առաջարկում է սահմանափակել կամ արգելել բջջային հեռախոսների օգտագործումը դպրոցներում։

«1-6-րդ դասարանցիներին բացարձակապես թույլ չտալ դասապրոցեսի, միջոցառումների, դասամիջոցների ժամանակ իրենց մոտ ունենալ միացված հեռախոսներ, առանձին դեպքերում երբ երեխան ստիպված պետք է բերի հեռախոսը դպրոց, այն դասերի սկզբին կհանձնվի դասղեկին, կլինի համապատասխան պահման վայրում և միայն դասերի ավարտից հետո թույլ կտրվի վերցնել։ 7-12-րդ դասարանցիների համար առաջարկվում է սահմանափակումներով օգտագործում՝ բացառապես կրթական նպատակներով, ուսուցչի հրահանգով և վերահսկողությամբ։ Սա կարող է շաբաթական 1-2 անգամ տեղի ունենալ»,- ներկայացրեց հանրակրթության վարչության պետ Մարգարիտ Խաչատրյանը։

Արձագանքելով այս նախաձեռնությանը՝ Երևանի քաղաքապետ Տիգրան Ավինյանն ասաց.

«Դպրոցականները սկզբում որոշակիորեն կընդվզեն մեր որոշմանը, բայց կրթության որակի, նրանց առօրյայի և նույնիսկ երջանկության վրա այս սահմանափակումները, վստահորեն, դրական ազդեցություն կունենան»։

Քաղաքապետարանը նախատեսում է նոր կարգը ներդնել Երևանի 15 դպրոցներում, մոնիթորինգ իրականացնել և մինչ հեռախոսների ամբողջական արգելքը՝ ստացված տվյալների հիման վրա տարեվերջին գնահատել աշակերտների ֆիզիկական, սոցիալական, հոգեբանական վիճակն ու առաջադիմության մակարդակը։

Մանրամասները՝ տեսանյութում։

Արփի Հակոբյան