02.11.2026 | 17:10
Ֆուտզալի Հայաստանի հավաքականը սկսել է հավաքը. ԼՈՒՍԱՆԿԱՐ
Կատարը հայտնել է, որ Թուրքիան կմասնակցի ՀԱՄԱՍ-ի հետ հանդիպմանը՝ Գազայի միջնորդական ծրագրի շուրջ
Քաղաքականություն
30.09.2025 | 22:59
Կատարը հայտարարել է, որ այսօր կկայանա հանդիպում՝ Թուրքիայի և ՀԱՄԱՍ-ի հետ Գազայի վերաբերյալ ԱՄՆ նախագահ Դոնալդ Թրամփի ծրագիրը քննարկելու համար, գրում է Daily Sabah-ը։
«(ՀԱՄԱՍ-ի) բանակցային պատվիրակությունը խոստացել է այն պատասխանատու կերպով ուսումնասիրել», – մամուլի ասուլիսում հայտարարել է Կատարի արտաքին գործերի նախարարության խոսնակ Մաջեդ ալ-Անսարին՝ հավելելով․
«Այսօր նաև մեկ այլ հանդիպում կլինի բանակցող պատվիրակության հետ, որին կմասնակցի նաև թուրքական կողմը»։
Միաժամանակ, թուրքական լրատվամիջոցները հաղորդել են, որ Ազգային հետախուզական կազմակերպության (MIT) տնօրեն Իբրահիմ Քալընը մեկնել է Կատար։
Երկուշաբթի օրը Թրամփը Սպիտակ տանը Իսրայելի վարչապետ Բենիամին Նեթանյահուի հետ մամուլի ասուլիսի ժամանակ հրապարակել էր 20 կետից բաղկացած ծրագիր՝ Իսրայելի կողմից Գազայի դեմ պատերազմը դադարեցնելու համար։
Ծրագրով նախատեսվում է ազատ արձակել բոլոր իսրայելցի գերիներին տասնյակ պաղեստինցի բանտարկյալների դիմաց, ՀԱՄԱՍ-ի լիակատար զինաթափում, իսրայելական ուժերի աստիճանական դուրսբերում և տեխնոկրատական, ապաքաղաքական պաղեստինյան կոմիտեի ստեղծում՝ անկլավը կառավարելու համար։
Թուրքիայի նախագահ Ռեջեփ Թայիփ Էրդողանը իր հերթին ողջունել է Թրամփի ծրագիրը։
«Ես բարձր եմ գնահատում ԱՄՆ նախագահ Դոնալդ Թրամփի ջանքերն ու առաջնորդությունը՝ ուղղված Գազայում արյունահեղությունը դադարեցնելուն և հրադադարի հասնելուն։ Թուրքիան կշարունակի նպաստել գործընթացին՝ բոլոր կողմերի համար ընդունելի արդար և երկարատև խաղաղության հաստատման նպատակով»,- X-ի իր միկրոբլոգում, մասնավորապես, գրել է Էրդողանը։
2023 թվականի հոկտեմբերից ի վեր Իսրայելի բանակի գործողությունների հետևանքով Գազայում սպանվել է ավելի քան 66,000 պաղեստինցի, մեծ մասը՝ կանայք և երեխաներ։ Անդադար ռմբակոծությունների հետևանքով անկլավը դարձել է ավերակ՝ հանգեցնելով սովի և հիվանդությունների տարածման։
Թարգմանությունը՝ Էմմա Չոբանյանի
