Լեհաստանում Ուկրաինայի քաղաքացի է ձերբակալվել «Հյուսիսային հոսք»-ի պայթյունին մասնակցելու կասկածանքով

Ուկրաինայի քաղաքացի Վլադիմիր Զ.-ն, որին Գերմանիան կասկածում է «Հյուսիսային հոսք» գազատարի պայթյունին մասնակցելու մեջ, ձերբակալվել է լեհական  Պրուշկովի ոստիկանության կողմից։ Լեհական RMF FM-ի փոխանցմամբ՝ նա այժմ տեղափոխվել է Վարշավայի շրջանային դատախազություն, փոխանցում է BBC-ի ռուսական ծառայությունը։

Նշվում է,  որ արտահանձնման գործընթացը շուտով կսկսվի։ Սակայն ձերբակալվածի փաստաբան Տիմոտեուշ Պապրոցկին ռադիոկայանի թղթակցին ասել է, որ իր հաճախորդին Գերմանիա արտահանձնելու հիմքեր չկան։

RMF FM-ը հաղորդում է, որ Վլադիմիր Զ.-ն ջրասուզակ-հրահանգիչ է: Գերմանական իրավապահ մարմինների վարկածով՝ 2022 թվականի սեպտեմբերին «Հյուսիսային հոսքը» պայթեցնելու գործողության ժամանակ նա զբոսանավով Ռոստոկից նավարկել է դեպի Բալթիկ ծով, այնուհետև սուզվել է ջրի տակ և պայթուցիկներ տեղադրել ստորջրյա գազատարի վրա:

Օգոստոսին Իտալիայում ձերբակալվել էր Ուկրաինայի քաղաքացի Սերգեյ Կ.-ն, որին գերմանական իրավապահ մարմինները կասկածում են գազատարի պայթեցմանը մասնակցելու մեջ։ Սեպտեմբերին իտալական դատարանը որոշում է կայացրել Գերմանիա նրա արտահանձնման մասին։

Գերմանացի քննիչների տվյալներով՝ գազատարի պայթեցման գործողությանը մասնակցել է յոթ մարդ։

Հիշեցնենք, որ Գերմանիայի քննչական մարմինները պարզել էին այն խմբի բոլոր անդամների ինքնությունը, որոնք, ենթադրաբար, իրականացրել են 2022 թվականի հոկտեմբերին ռուսական «Հյուսիսային հոսք» և «Հյուսիսային հոսք 2» գազատարների պայթյունները։ Գերմանիան կալանքի օրդեր էր տվել «Հյուսիսային հոսք»-ի պայթյունի գործի բոլոր մասնակիցների համար, որոնք Ուկրաինայի քաղաքացիներ են։

Թարգմանությունը՝ Էմմա Չոբանյանի