22.05.2026 | 10:51
Սևան-Ծափաթաղ ճանապարհին 22-ամյա կինը մեքենայից դուրս է նետվել և մահացել․ 21-ամյա վարորդը ձերբակալվել է
Գերմանիան կալանքի օրդեր է տվել «Հյուսիսային հոսք»-ի պայթյունի գործի բոլոր մասնակիցների համար․ նրանք Ուկրաինայի քաղաքացիներ են
Քաղաքականություն
28.08.2025 | 16:35
Գերմանիայի քննչական մարմինները պարզել են այն խմբի բոլոր անդամների ինքնությունը, որոնք, ենթադրաբար, իրականացրել են 2022 թվականի հոկտեմբերին ռուսական «Հյուսիսային հոսք» և «Հյուսիսային հոսք 2» գազատարների պայթյունները։ Նրանցից միայն մեկն է կալանավորվել, մինչդեռ մյուս բոլորի համար կալանքի օրդերներ են տրվել, գրում է DW-ի ռուսական ծառայությունը։
Ընդհանուր առմամբ, քննիչների կարծիքով, հարձակմանը մասնակցել է Ուկրաինայի յոթ քաղաքացի՝ չորս ջրասուզակ, պայթուցիկների մասնագետ, «Անդրոմեդա» զբոսանավի կապիտանը և խմբի ղեկավար Սերգեյ Կ.-ն, որը վերջերս ձերբակալվել էր Իտալիայում:
Ենթադրվում է, որ խմբի յոթերորդ անդամը՝ Եվգենի Ու.-ն, խմբին միացել է ավելի ուշ՝ 2022 թվականի սեպտեմբերի 19-ից 23-ը, և սկզբում պետք է մասնակցեր մեկ այլ գազատարի՝ «Թուրքական հոսքի» պայթեցմանը, սակայն այս գործողությունը ձախողվել է:
Յոթ կասկածյալների թվում կա մեկ կին՝ պրոֆեսիոնալ ջրասուզալ Վալերիա Տ.-ն։
Die Zeit-ը հաղորդում է, որ «Հյուսիսային հոսքի» պայթեցման գործողության ենթադրյալ մասնակիցներից Վսևոլոդ Կ.-ն մահացել է ռազմաճակատում 2024 թվականի վերջին, իսկ մնացածը, հավանաբար, թաքնվում են Ուկրաինայում: Բեռլինի խնդրանքով նրանցից մեկին փորձել են ձերբակալել Լեհաստանում, որտեղ նա ապրել է գազատարների վրա հարձակումից հետո, սակայն ձերբակալությունից կարճ ժամանակ առաջ նա Վարշավայից մեկնել է Կիև Ուկրաինայի ռազմական կցորդի մեքենայով։
Գերմանիան դեռևս չի ներկայացրել իրավական օգնության դիմում Ուկրաինայի իշխանություններին՝ պայթյունի ենթադրյալ մեղավորներին արտահանձնելու համար։
Գերմանական լրատվամիջոցների տվյալներով՝ ամենակարևոր ապացույցներից մեկը պատահաբար է հայտնվել քննիչների ձեռքում. 2022 թվականի սեպտեմբերի 8-ի գիշերը Ռյուգեն կղզում գտնվող տեսախցիկը ֆիքսել է խմբի ավտոմեքենան՝ առագաստանավի մոտ գնալու ճանապարհին։
Թարգմանությունը՝ Էմմա Չոբանյանի
