19.08.2026 | 23:15
Նոր տոն․ հունիսի 23-ը նշվելու է որպես Հանրային ծառայողի օր
Քննարկվել են Հայաստանի և Չինաստանի իրավապահ համակարգերի համագործակցության ընդլայնման հարցեր
Քաղաքականություն
29.09.2025 | 15:09
ՆԳ նախարարի տեղակալ Արմեն Մկրտչյանը Չինաստանի Ժողովրդական Հանրապետություն կատարած այցի շրջանակում հանդիպել է ՉԺՀ հասարակական անվտանգության նախարարի տեղակալ Չեն Սիյուանի հետ․ հայտնում են ՆԳՆ-ից:
«Ողջունելով հյուրերին՝ Չեն Սիյուանը բարձր է գնահատել դեռևս 2015 թվականին Պեկինում ստորագրված Համաձայնագրի հիման վրա ձևավորված համագործակցությունը և այն ընդլայնելու պատրաստակամություն հայտնել։
Արմեն Մկրտչյանը, շնորհակալություն հայտնելով ջերմ ընդունելության համար, կարևորել է երկու երկրների իրավապահ մարմինների արդյունավետ համագործակցությունը՝ առաջարկելով այն բարձրացնել նոր մակարդակի՝ կողմերի միջև ստորագրելով փոխգործակցության նոր պայմանագիր, ինչին չինական կողմը դրական է արձագանքել»,- ասված է գերատեսչության տարածած հաղորդագրությունում։
ՆԳ նախարարի տեղակալը նաև ընդգծել է Հայաստանի Հանրապետությունում Չինաստանի Ժողովրդական Հանրապետության դեսպանությունում հասարակական անվտանգության նախարարության ներկայացուցչի, ինչպես նաև Հայաստանի Հանրապետությունում Ինտերպոլի Ազգային կենտրոնական բյուրոյի միջոցով իրականացվող համագործակցության կարևորությունը, որը հնարավորություն է տալիս ապահովել օպերատիվ տեղեկատվության փոխանակում ու երկու երկրների իրավապահ համակարգերի միջև համադրված գործողություններ։
Նշվում է, որ կողմերն անդրադարձել են նաև իրավապահ մարմինների համատեղ գործունեության արդյունավետության բարձրացմանն ուղղված հարցերին, մասնավորապես՝ անդրազգային հանցավորության, այդ թվում՝ համացանցում կատարվող հանցագործությունների, կիբեռհանցավորության, թմրամիջոցների ապօրինի շրջանառության, տնտեսական հանցագործությունների, թրաֆիքինգի և այլ հանցատեսակների դեմ պայքարի ոլորտներում։
