20.12.2025 | 20:00
100,000 ռուբլի՝ ՀՀ-ում լրտեսության համար․ ՌԴ քաղաքացիները Հայաստանում տվյալներ են հավաքել․ ՏԵՍԱՆՅՈՒԹ
ՌԴ հանցագործությունները Բուչայում. The Sunday Times-ը 13 անուն է հրապարակել
Քաղաքականություն
28.09.2025 | 18:53
Բրիտանական The Sunday Times թերթը հրապարակել է 13 ռուս սպաների անունները, որոնք կասկածվում են 2022 թվականի գարնանը Բուչա քաղաքում կատարված ծանր ռազմական հանցագործություններում։ Նյութը հրապարակվել է շաբաթ օրը՝ սեպտեմբերի 27-ին, թերթի կայքում։
Ուկրաինայի գլխավոր դատախազի գրասենյակը և Կիևի կողմից ներկայացված պաշտոնական կասկածի ծանուցագրերը հաստատել են այդ անուններից ութի տվյալները։ Այս քայլը համարվում է նախնական փուլ՝ տեղական դատարաններում կամ Միջազգային քրեական դատարանում հնարավոր հետապնդման նախաշեմին։
Մնացած հինգ անձանց ինքնությունը պարզվել է նրանց ենթականերին ուղղված կասկածի ծանուցագրերի և ռուսական ռազմական բաց փաստաթղթերի խաչաձև վերլուծության միջոցով։ Այդ զինծառայողների դեմ դեռ կասկածի պաշտոնական ծանուցումներ չեն ներկայացվել։
Թերթի տվյալներով՝ բոլոր 13 անձանց ինքնությունը պարզվել է անկախ իրավաբանների և հետաքննողների կողմից՝ բաց աղբյուրների միջոցով։ Նրանց տվյալները հաստատվել են նաև ուկրաինական հատուկ ծառայությունների կողմից։
Նրանց թվում է գեներալ-գնդապետ Ալեքսանդր Չայկոն, Արևելյան ռազմական օկրուգի հրամանատարը, որը ղեկավարել է ռուսական բանակը Ուկրաինա ներխուժման սկզբնական փուլում և եղել է երկրի տարածքում գտնվող ամենաբարձր աստիճանի զինվորականը։
2-րդը գեներալ-մայոր Սերգեյ Չուբարիկին է՝ էլիտար 76-րդ գվարդիական դեսանտա-հարձակման դիվիզիայի հրամանատարը։ Նրա անմիջական հրամանատարության տակ գտնվող զինվորներն, ըստ մեղադրանքների, իրականացրել են Բուչայում կատարված ռազմական հանցագործությունների մեծ մասը, այդ թվում՝ մահապատիժներ, խոշտանգումներ և լայնածավալ թալան։
Գնդապետ Ազատբեկ Օմուրբեկովը 64-րդ առանձին մոտոհրաձգային բրիգադից է։ Ըստ ԱՄՆ Պետդեպարտամենտի, անձամբ ներգրավված է եղել «մարդու իրավունքների կոպիտ խախտումների» մեջ, այդ թվում՝ «ուղղակի պատասխանատվություն է կրել սպանությունների, բռնաբարությունների և խոշտանգումների» համար։
The Sunday Times-ը նշում է, որ այս 13 սպաների հրամանատարության տակ են գտնվել ավելի քան 80 զինվորներ, որոնք ևս կասկածվում են Բուչայում կատարված հանցագործություններում։
2022 թվականի մարտին Բուչայում գործել են ՌԴ ԶՈւ 234-րդ գվարդիական դեսանտա-հարձակման գնդի, 76-րդ գվարդիական դեսանտա-հարձակման դիվիզիայի, ինչպես նաև 35-րդ և 36-րդ համազորային բանակների դեսանտային ստորաբաժանումները։
Հիշեցնենք՝ Բուչան փոքրիկ քաղաք է Կիևի մարզում, ազատագրվել է ռուսական օկուպացիայից 2022 թվականի մարտի 31-ին՝ Ուկրաինայի դեմ Ռուսաստանի լայնածավալ ներխուժումից հինգ շաբաթ անց։ Քաղաքային իշխանությունների տվյալներով՝ այդ հինգ շաբաթների ընթացքում Բուչայում սպանվել է 458 քաղաքացիական անձ, որոնցից 419-ը՝ գնդակահարվել կամ զոհվել են խոշտանգումների հետևանքով։
Բուչան դարձել է ռուսական ռազմական դաժանության խորհրդանիշ։
