06.12.2025 | 23:56
Կապարակնքել են Գյումրիի Յոթ Վերք եկեղեցու դռները` Փաշինյանի այցից առաջ
«Մոլդովայի ճակատագիրն է դրված խաղասեղանին». երկրում խորհրդարանական ընտրություններ են
Քաղաքականություն
28.09.2025 | 10:59
Սեպտեմբերի 28-ին Մոլդովայի քաղաքացիները ընտրում են խորհրդարանի 101 պատգամավոր: Մինչ այժմ խորհրդարանում 61 մանդատ պատկանում էր եվրոպամետ «Գործողություն և համերաշխություն» (PAS) կուսակցությանը։ Նախագահ Մայա Սանդուն, դիմելով իր հայրենակիցներին, հիշեցրել է, որ երկիրը խորհրդարանական հանրապետություն է, ուստի «Մոլդովայի ճակատագիրն է դրված խաղասեղանին», քանի որ հենց օրենսդիր մարմինն է որոշելու երկրի ապագան՝ եվրոպական միությանը անդամակցելու հարցը դեռ մնում է ամենակարևորներից, փոխանցում է DW-ն։
Մոլդովայի բնակչությունը մոտ 2,4 միլիոն է։ Տասնյակ հազարավոր մոլդովացիներ, ովքեր ապրում են արտերկրում՝ հիմնականում ԵՄ-ում, նույնպես կարող են մասնակցել քվեարկությանը։ Երկրի տարածքում ընտրական տեղամասերը բաց են առավոտյան 07:00-ից մինչև երեկոյան 22:00 (երևանյան ժամանակով)։ Առաջին նշանակալի արդյունքները սպասվում են միայն երկուշաբթի օրը։
Մոլդովայի Կենտրոնական ընտրական հանձնաժողովը (ԿԸՀ) թեկնածուների վերջնական ցուցակը հրապարակել է մոտ 2 շաբաթ ուշացումով՝ մի շարք քաղաքական ուժերի գրանցումը մերժելու հետ կապված դատական վեճերի պատճառով։ Սկզբնական շրջանում ընտրություններին մասնակցելու իրավունք ստացել էին 23 միավոր՝ չորս ընտրական դաշինք, 15 կուսակցություն և չորս անկախ թեկնածու։ Սակայն, ինչպես կանխատեսում են տարբեր ուղղվածությամբ հարցումները, խորհրդարան կարող են անցնել ընդամենը չորս քաղաքական ուժ։
