29.04.2026 | 00:57
Չեմպիոնների լիգա․ ՊՍԺ-ն գերգոլառատ խաղում հաղթեց «Բավարիային». ՏԵՍԱՆՅՈՒԹ
Ուկրաինա-Հունգարիա սահմանին հետախուզական անօդաչու թռչող սարքեր են հայտնաբերվել
Քաղաքականություն
26.09.2025 | 19:52
Հունգարիայի և Ուկրաինայի սահմանին հետախուզական անօդաչու թռչող սարքեր են հայտնաբերվել։ Այս մասին հայտարարել է Ուկրաինայի նախագահ Վլադիմիր Զելենսկին ռազմական խորհրդակցությունից հետո տելեգրամում արված գրառման մեջ, գրում է BBC-ի ռուսական ծառայությունը։
«Ուկրաինայի ռազմական ուժերը մեր օդային տարածքում հայտնաբերել են հետախուզական անօդաչու թռչող սարքեր, դրանք, հավանաբար, հունգարական անօդաչուներ են։ Հնարավոր է՝ դրանք նախնական հետախուզություն էին իրականացնում Ուկրաինայի սահմանամերձ շրջաններում գտնվող արդյունաբերական ներուժի հետ կապված։ Ես հանձնարարել եմ ստուգել բոլոր առկա տվյալները և անհապաղ հաղորդել յուրաքանչյուր գրանցված միջադեպի մասին»,- գրել է Զելենսկին։
Նա հայտնել է, որ ռազմական խորհրդակցություն է անցկացրել Ուկրաինայի զինված ուժերի գերագույն հրամանատար Ալեքսանդր Սիրսկիի, ԶՈՒ Գլխավոր շտաբի պետ Անդրեյ Գնատովի, պաշտպանության նախարար Դենիս Շմիգալի և նախագահի աշխատակազմի ղեկավարի տեղակալ Պավել Պալիսայի հետ։
Հանդիպման ընթացքում քննարկվել է ռազմաճակատում տիրող իրավիճակը։ Հիմնական ուշադրությունը դարձվել է Դոբրոպիլյայի գործողությանը։ Այսօրվա դրությամբ՝ ուկրաինական ուժերն ազատագրել են 168,8 քառակուսի կիլոմետր տարածք։ Եվս 187,7 քառակուսի կիլոմետր տարածք մաքրվել է ռուս դիվերսանտներից, ասել է Ուկրաինայի նախագահը։
Առանձին զեկույցներ են ներկայացվել Կուպյանսկում և շրջակա տարածքներում տիրող իրավիճակի, ինչպես նաև Խարկովի և Դոնեցկի մարզերում ուկրաինական գործողությունների վերաբերյալ։
Թարգմանությունը՝ Էմմա Չոբանյանի
