05.11.2026 | 00:08
Ինչ է որոշել ընդդիմությունը. Նարեկ Կարապետյանը հանդիպումից հետո մանրամասներ հայտնեց. ՏԵՍԱՆՅՈՒԹ
Պաշտոնանկ է արվել Արմավիրի մարզային քննչական վարչության պետը
Հասարակություն
26.09.2025 | 15:29
Քննչական կոմիտեի Արմավիրի մարզային քննչական վարչության պետ Հրաչյա Ղազարյանն ազատվել է աշխատանքից։ Factor.am-ը տեղեկանում է, որ արդարադատության առաջին դասի խորհրդականի պաշտոնանկությունը եղել է սեպտեմբերի 25-ին։
Նշենք, որ Ղազարյանը այդ պաշտոնում նշանակվել էր 2024-ի գարնանը։ Մինչ այդ զբաղեցնում էր քննչական կոմիտեի Երևան քաղաքի քննչական վարչության Երևան քաղաքի Արաբկիր վարչական շրջանի քննչական բաժնի պետի պաշտոնը։ Հրաչյա Ղազարյանի պարտականությունները կկատարի նրա տեղակալ, արդարադատության առաջին դասի խորհրդական Արտակ Ղազարյանը։ Համապատասխան որոշումը ՔԿ պետ Արթուր Պողոսյանը ստորագրել է երեկ՝ սեպտեմբերի 25-ին։
Հավելենք, որ այսօր ևս մեկ պաշտոնանկություն ՆԳՆ-ում է եղել․ ՆԳՆ Քրեական ոստիկանության գլխավոր վարչության Արմավիրի մարզային վարչության պետ Արթուր Բդոյանը պաշտոնանկ է արվել Փարաքարի համայնքապետ Վալոդյա Գրիգորյանի և քրեական ոստիկան Կարեն Աբրահամյանի սպանությունից երկու օր անց:
Արդյոք պաշտոնանկություններ կան նաև Գլխավոր դատախազությունում․ իրավապահ կառույցից փոխանցեցին, որ մեկնաբանություն չունեն։
Նշենք, որ սպանությունից հետո Նիկոլ Փաշինյանը ֆեյսբուքում գրել էր, որ «ՀՀ իրավապահները պարտավոր են շուտափույթ բացահայտել հանցագործության մեջ ներգրավված բոլոր անձանց»։ Փաշինյանը նաև գրել էր, որ անհրաժեշտ հետևություններ կարվեն, երբ «մանրամասն վերլուծության ենթարկվի հարցը, թե կանխարգելիչ ինչպիսի՞ գործողություններ պետք է կատարվեին Փարաքարում բռնությունների շարք թույլ չտալու համար, ովքեր պիտի կատարեին այդ գործողությունները և ինչու չեն կատարել»։
Երեկ ՆԳ նախարար Արփինե Սարգսյանը մեր հարցին ի պատասխան միայն ասաց, որ «ակտիվ աշխատանքներ են իրականացվում»` առանց որևէ մանրամասն հայտնելու: ՆԳՆ խոսնակ Նարեկ Սարգսյանն էլ քիչ առաջ փոխանցեց, որ որևէ նոր բան չեն կարող հայտնել։
Արփի Հակոբյան
