19.02.2026 | 14:45
ՌԴ-ն 2026 թվականին լայնածավալ ազդեցության արշավ կսկսի Հայաստանի դեմ. Էստոնիայի արտաքին հետախուզության ծառայություն
Factor TV-ի հրապարակումից հետո անօթևան, առողջական խնդիրներով տղամարդուն տեղափոխել են հիվանդանոց
Հասարակություն
26.09.2025 | 10:45
Factor TV-ի հրապարակումից հետո՝ 15 տարի փողոցում ապրող Քալաշ Քալաշյանին տեղափոխել են հիվանդանոց։ Այս մասին ֆեյսբուքյան գրառմամբ տեղեկացրել է Աշխատանքի և սոցիալական հարցերով նախարարի մամուլի քարտուղար Նվեր Կոստանյանը․
«Ի պատասխան լրատվամիջոցների կողմից անօթևան քաղաքացի Քալաշ Քալաշյանի վերաբերյալ Աշխատանքի և սոցիալական հարցերի նախարարությանն ուղղված հարցադրումների՝ տեղեկացնում եմ, որ նախարարության Միասնական սոցիալական ծառայության աշխատակիցների ուղեկցությամբ վերջինս շտապօգնությամբ տեղափոխվել է ՀՀ ԱՆ «Մաշկաբանության ազգային կենտրոն» և ներկայումս գտնվում է բժշկական վերահսկողության ներքո։ Տեղեկացնեմ նաև, որ Քալաշյանը ՄՍԾ աշխատակիցների ջանքերի արդյունքում համաձայնվել է բուժօգնություն ստանալուց հետո տեղափոխվել անօթևանների ժամանակավոր կացարան, որտեղ էլ կիրականացվի Քալաշյանի կարիքների համակողմանի գնահատումը։ Հավելեմ նաև, որ նախկինում ևս Քալաշյանին առաջարկվել է տեղափոխվել կացարան, վերջինս, սակայն, հրաժարվել էր դրանից»։
Հիշեցնենք՝ երեկ գրել էինք, որ Երևանի կենտրոնում՝ Կառավարության շենքից և Առողջապահության, Աշխատանքի և սոցիալական հարցերի նախարարությունների շենքից ընդամենը մի քանի մետր հեռավորության վրա, փողոցում արդեն 15 տարի ապրում է 65-ամյա Քալաշ Քալաշյանը։
Տղամարդը պատմել էր, որ տարիներ առաջ դատապարտված է եղել ազատազրկման, բանտից ազատ արձակվելուց հետո, սակայն, չի կարողացել հայրական տուն մտնել, քանի որ պարզել է՝ եղբայրը վաճառել է այն և իրեն մասնաբաժին չի հատկացրել։ Ընտանեկան վեճն այդպես էլ չի լուծվել, ինչի պատճառով արդեն 15 տարի է՝ սառնամանիքից մինչև կիզիչ արև, դրսում է՝ բաց երկնքի տակ։ Քալաշյանն այս ընթացքում ձեռք է բերել մի շարք խնդիրներ, սառնամանիքից ցրտահարվել էին ոտքերը, ինչի պատճառով երկար տարիներ է՝ անվասայլակին է։
Ռոզա Վարդանյան
