Բաքվի դատարանում շինծու գործերով նիստում որպես ապացույց ուսումնասիրվել է Մանվել Գրիգորյանի հարցազրույցը

Բաքվի զինվորական դատարանում Արցախի ղեկավարների, պաշտոնյաների նկատմամբ հարուցված շինծու քրեական գործերով հերթական նիստն է տեղի ունեցել։ Ադրբեջանական լրատվամիջոցների հաղորդմամբ՝ դատական ​​նիստի սկզբում Արցախի ՊԲ նախկին հրամանատար Լևոն Մնացականյանը դիմել է դատարանին՝ իրեն հնարավորություն տալ ծանոթանալ մի քանի նիստերի արձանագրություններին։

Նախագահող դատավորը Լևոն Մնացականյանին տեղեկացրել է, որ կստեղծվեն համապատասխան պայմաններ, որպեսզի նա ծանոթանա նիստերի արձանագրություններին։

Դատական ​​նիստը շարունակվել է ՀՀ պաշտպանության նախկին փոխնախարար Մանվել Գրիգորյանի կողմից լրատվամիջոցներին տված հարցազրույցի՝ որպես քրեական գործի ապացույցի հետազոտությամբ։ Հարցազրույցում  Գրիգորյանը, իբր, խոսել է «Ադրբեջանի ինքնիշխան հողերում Հայաստանից ստացված հրահանգներին համապատասխան իր կողմից կատարված հանցագործությունների և սադրանքների մասին»։

Բացի այդ, հարցազրույցում նա, իբր, պատմել է Հայաստանի նախկին նախագահներ Ռոբերտ Քոչարյանի և Սերժ Սարգսյանի կողմից «ադրբեջանական տարածքների օկուպացիային մասնակցելու մասին», ասել, թե Հայաստանից բարձրաստիճան զինվորականներ՝ գեներալներ և գնդապետներ, ուղարկվել են Արցախի տարածքներում զորամասեր ստեղծելու: Գրիգորյանը գեներալներից մեկի անունն է տվել՝ Արտուշ, որը եղել է Գյումրիից։

«Մենք սկսեցինք գրավել թյուրքական  գյուղերը։ Մենք ներխուժել, ավերել ենք գյուղեր, ոչնչացրել ամեն ինչ»,- հարցազրույցում, իբր, ասել է Գրիգորյանը։

Նա նաև նշել է, թե ինքը բրիգադի հրամանատար է եղել Հայաստանի զինված ուժերում, ՀՀ պաշտպանության նախարար Վազգեն Մանուկյանի հրամանով իրեն ուղարկել են Արցախի տարածքներ։

Նիստում ներկայացվել են նաև քրեական գործին վերաբերող մի շարք փաստաթղթեր։

Հաջորդ դատական նիստը նշանակվել է սեպտեմբերի 26-ին։

Թարգմանությունը՝ Էմմա Չոբանյանի