11.09.2026 | 21:05
Փրկարարները Ալավերդիում 15 մետր խորությունից դուրս են բերել արգելափակված օտարերկրացուն
Ֆրանսիայի նախկին նախագահը 5 տարվա ազատազրկման է դատապարտվել
Քաղաքականություն
25.09.2025 | 17:06
Փարիզի դատարանը Ֆրանսիայի նախկին նախագահ Նիկոլա Սարկոզիին դատապարտել է 5 տարի ժամկետով ազատազրկման՝ դատավճռի կատարման հետաձգմամբ և 100,000 եվրո տուգանքի՝ մեղավոր ճանաչելով նրան 2000-ականների կեսերին Լիբիայի բռնապետ Մուամմար Քադաֆիի հետ դավադրության մեջ, հաղորդում են BFMTV-ն և Le Monde-ը, գրում է Current time-ը։
Քննության տվյալներով՝ 2005 թվականին Սարկոզին և նրա աշխատակազմը գաղտնի համաձայնության են եկել Քադաֆիի հետ և 2006-2007 թվականներին նրանից ստացել են առնվազն 50 միլիոն եվրո, որը Սարկոզին, ենթադրաբար, օգտագործել է իր նախընտրական քարոզարշավը ֆինանսավորելու համար։ Փոխարենը, ինչպես պնդում է քննությունը, Ֆրանսիան բարենպաստել է Քադաֆիի ռեժիմին։
Սարկոզին հերքել է ցանկացած չարաշահում և քննիչների կողմից ներկայացված փաստաթղթերը անվանել է կեղծ։
Նախկին նախագահն արդարացվել է այլ մեղադրանքներով («պասիվ կոռուպցիա», «անօրինական քարոզարշավի ֆինանսավորում» և «Լիբիայի պետական միջոցների յուրացման թաքցում»):
Նախագահող դատավորը նշել է, որ դատավարության ընթացքում քննիչները չեն կարողացել ապացուցել, որ «Լիբիայից ուղարկված գումարները» «վերջնական արդյունքում» օգտագործվել են Նիկոլա Սարկոզիի 2007 թվականի նախընտրական քարոզարշավը ֆինանսավորելու համար:
«Դատարանը կոռուպցիոն հանցագործության որևէ էական տարր չի գտել»,- ասել է դատավոր Նատալի Գավարինոն:
Նիկոլա Սարկոզին նաև հինգ տարի չի կարողանա առաջադրվել նախագահական ընտրություններում։
Հիշեցնենք, որ այսօր ավելի վաղ Նիկոլա Սարկոզին մեղավոր էր ճանաչվել Լիբիայի հանգուցյալ առաջնորդ գնդապետ Մուամմար Քադաֆիից միլիոնավոր եվրոների անօրինական միջոցներ ստանալու գործով։
Թարգմանությունը՝ Էմմա Չոբանյանի
