02.07.2026 | 13:21
Անդրանիկ Թևանյանը դատի է տվել Վահագն Ալեքսանյանին․ պահանջում է հերքում, ներողություն և 9 մլն դրամ
Փարիզի դատարանը Սարկոզիին մեղավոր է ճանաչել Քադաֆիից գումարներ ստանալու գործով
Քաղաքականություն
25.09.2025 | 15:32
Ֆրանսիայի նախկին նախագահ Նիկոլա Սարկոզին մեղավոր է ճանաչվել Լիբիայի հանգուցյալ առաջնորդ գնդապետ Մուամմար Քադաֆիից միլիոնավոր եվրոների անօրինական միջոցներ ստանալու գործով, գրում է BBC-ն։
Փարիզի քրեական դատարանը նրան արդարացրել է մնացած բոլոր մեղադրանքներից, այդ թվում՝ պասիվ կոռուպցիայի և քարոզարշավի անօրինական ֆինանսավորման։ Սարկոզին, որը պնդում է, որ գործը քաղաքական դրդապատճառներ ունի, մեղադրվում էր Քադաֆիից ստացված միջոցները իր 2007 թվականի ընտրարշավը ֆինանսավորելու համար օգտագործելու մեջ։
Մեղադրական կողմը պնդում էր, որ Սարկոզին խոստացել էր օգնել Քադաֆիին պայքարելու արևմտյան երկրների աչքում իր՝ որպես վատ համբավի դեմ։
70-ամյա Սարկոզին Ֆրանսիայի նախագահն էր 2007-ից 2012 թվականներին։
Հետաքննությունը սկսվել է 2013 թվականին՝ երկու տարի անց այն բանից հետո, երբ Սեյֆ ալ-Իսլամը՝ այն ժամանակվա Լիբիայի առաջնորդի որդին, առաջին անգամ մեղադրել էր Սարկոզիին հոր միլիոնավոր դոլարները վերցնելու մեջ՝ քարոզարշավի ֆինանսավորման համար։ Հաջորդ տարի լիբանանցի գործարար Զիադ Թաքիեդդինը, որը երկար ժամանակ միջնորդ էր Ֆրանսիայի և Մերձավոր Արևելքի միջև, հայտարարել էր, որ գրավոր ապացույցներ ունի, որ Սարկոզիի քարոզարշավը «առատորեն» ֆինանսավորվել է Տրիպոլիի կողմից, և որ 50 միլիոն եվրոյի (43 միլիոն ֆունտ սթերլինգ) վճարումները շարունակվել են նաև նրա նախագահ դառնալուց հետո։
Սարկոզիի կնոջը՝ իտալական ծագումով նախկին սուպերմոդել և երգչուհի Կառլա Բրունի-Սարկոզիին անցյալ տարի մեղադրանք է առաջադրվել Քադաֆիի գործի հետ կապված ապացույցները թաքցնելու և խարդախություն կատարելու համար մեղավորների հետ համագործակցելու մեջ։ Նա հերքում է մեղադրանքները։
2012 թվականի ընտրություններում պարտվելուց հետո Սարկոզին մի քանի քրեական հետաքննությունների թիրախ է դարձել։
Նա նաև բողոքարկել է 2024 թվականի փետրվարի որոշումը, որով նրան մեղավոր էր ճանաչել 2012 թվականի ընտրարշավի ժամանակ չափից շատ ծախսելու, ապա այն թաքցնելու համար PR գործակալություն վարձելու մեջ։ Նա դատապարտվել է մեկ տարվա ազատազրկման, որից վեց ամիսը՝ պայմանականորեն։
2021 թվականին նա մեղավոր է ճանաչվել դատավորին կաշառելու փորձի մեջ և դարձել է Ֆրանսիայի առաջին նախկին նախագահը, որը բանտարկության է դատապարտվել։ Դեկտեմբերին Փարիզի վերաքննիչ դատարանը որոշել էր, որ նա կարող է իր պատիժը կրել տանը՝ բանտարկության փոխարեն։
Թարգմանությունը՝ Էմմա Չոբանյանի
