16.06.2026 | 12:45
«Արարատցեմենտ»-ում ժամանակավոր կառավարիչ կարող է նշանակվել․ Դատախազությունը դիմել է Կառավարությանը
Վարչապետի աշխատակազմի բյուջեն աճում է 1,5 մլրդ դրամով
Տնտեսություն
25.09.2025 | 16:17
Վարչապետի աշխատակազմի բյուջեն 2026-ին 2025-ի համեմատ աճում է 1,5 մլրդ դրամով։ Եթե այս տարի այն 24 միլիարդ 365 միլիոն դրամ է, ապա մյուս տարի դառնում է 25 միլիարդ 800 մլն դրամ։
Factor.am-ն ուսումնասիրել է վարչապետի աշխատակազմի ծախսերի ցանկը և առանձնացրել որոշ ուղղություններ։ Մասնավորապես, նշված գումարից 621 մլն 340 հազար դրամը հատկացվել է կառավարական առանձնատների սպասարկմանը, 27 մլն դրամ՝ «Քաղաքացու օր» տոնակատարությանը, 175 մլն դրամ՝ «Մեր ժամանակների հերոսը» մրցանակաբաշխությանը։
ՀՀ նախագահի աշխատակազմին 2026 թվականի բյուջեով 1 մլրդ 618 մլն դրամ է հատկացվելու։ Այս տարվա համեմատ բյուջեն նվազում մի քանի տասնյակ միլիոն դրամով։
Հաջորդ տարի 7 մլրդ դրամ կկազմի Ազգային ժողովի բյուջեն։ Այս տարվա համեմատ էական փոփոխություն չկա։ Խորհրդարանի բյւոջեն նվազում է ընդամենը 72 մլն դրամով։
2026 թվականի ընթացքում անցկացվող ԱԺ ընտրությունների և սահմանադրական փոփոխությունների հանրաքվեի անցկացման համար էլ նախատեսվում է բյուջեից ծախսել 4 մլրդ 451 մլն դրամ։
19,2 մլրդ դրամ էլ հատկացվելու է Արտաքին գործերի նախարարությանը։ Էական աճում է ԱԳՆ-ի բյուջեն, այն այս տարի 17 միլիարդ 441 միլիոն դրամ էր։
Նշենք, որ Հայաստանի պետական բյուջեի ծախսերը 2026-ին 3 տրիլիոն 628 միլիարդ դրամ է լինելու: պետական բյուջեի պակասուրդը 2026 թվականին նախատեսվում է 537 միլիարդ դրամ՝ ՀՆԱ-ի 4,5 տոկոսը։
Նարեկ Կիրակոսյան
