Զելենսկին հայտարարել է, որ պատերազմի ավարտից հետո պատրաստ է լքել Ուկրաինայի նախագահի պաշտոնը

Ուկրաինայի նախագահ Վլադիմիր Զելենսկին հայտարարել է, որ չի պատրաստվում երկիրը ղեկավարել խաղաղ ժամանակ։ Այս մասին նա ասել է Axios-ին տված հարցազրույցում, փոխանցում է ՌԲԿ Ուկրաինան։

«Իմ նպատակն է ավարտել պատերազմը, այլ ոչ թե շարունակել առաջադրվել ընտրություններում»,- ասել է Զելենսկին։

Հարցին՝ արդյո՞ք պատերազմի ավարտից հետո իր աշխատանքն ավարտված է համարում, Զելենսկին պատասխանել է, որ պատրաստ է հրաժարական տալ: Նա հավելել է՝ պատրաստ է դիմել Գերագույն Ռադային՝ հրադադարի դեպքում ընտրություններ անցկացնելու խնդրանքով:

Զելենսկին նշել է, որ գոյություն ունեն որոշակի խոչընդոտներ, առաջին հերթին՝ երկրի մի քանի շրջաններում անվտանգության իրավիճակը և Ուկրաինայի Սահմանադրության դրույթները․ երկրի հիմնական օրենքը հստակորեն արգելում է ընտրություններ անցկացնել ռազմական դրության ժամանակ: Այնուամենայնիվ, Զելենսկին, կարծում է, որ ընտրությունները հնարավոր են։

Հարցազրույցում նա նաև ասել է, որ ԱՄՆ նախագահ Դոնալդ Թրամփն աջակցել է Ուկրաինայի իրավունքին՝ հակահարված տալու ռուսական հարձակումներին, մասնավորապես՝ էներգետիկ ոլորտում։ Ըստ նրա՝ նախօրեի հանդիպման ժամանակ Թրամփը բարձրացրել է Ուկրաինայի կողմից ռուսական հարվածներին նույն կերպ արձագանքելու հարցը։ Նա հավելել է, որ Թրամփը նույն մեկնաբանությունն է արել անօդաչու թռչող սարքերի արտադրության օբյեկտների և հրթիռային բազաների վերաբերյալ, չնայած Ռուսաստանը լավ պաշտպանված է։

«Եթե նրանք հարձակվեն մեր էներգետիկ ոլորտի վրա, նախագահ Թրամփն աջակցում է այն գաղափարին, որ մենք կարող ենք պատասխանել էներգետիկային հարվածներով», – ասել է  Զելենսկին։

Նա նշել է, որ Ուկրաինան արդեն ունի անօդաչու թռչող սարքեր, որոնք կարող են հարվածել Ռուսաստանի խորքին, բայց նաև ասել,  որ Թրամփից խնդրել է  զենք, որը կարող է  արագացնել պատերազմի ավարտը։ Այնուամենայնիվ, նա չի բացահայտել, թե ինչ զենքերի մասին է խոսքը:

«Մեզ դա անհրաժեշտ է, բայց դա չի նշանակում, որ մենք այն կօգտագործենք։ Որովհետև եթե դա անենք, կարծում եմ՝ դա լրացուցիչ ճնշում կգործադրի Պուտինի վրա՝ նրան ստիպելով նստել բանակցությունների սեղանի շուրջ»,- հավելել է Զելենսկին։

Թարգմանությունը՝ Էմմա Չոբանյանի