Եվրոպայում ատոմային էներգետիկայի կրճատումը ռազմավարական սխալ էր. Ուրսուլա ֆոն դեր Լայեն

Ուրսուլա ֆոն դեր Լայենը հայտարարել է, որ Եվրոպայում ատոմային էներգետիկայի կրճատումը «ռազմավարական սխալ» է եղել։ Այս մասին Եվրոպական հանձնաժողովի նախագահը նշել է Փարիզի մերձակայքում անցկացված միջուկային էներգետիկայի գագաթնաժողովում։

Նրա խոսքով՝ վերջին տարիներին աշխարհում նկատվում է ատոմային էներգետիկայի վերածնունդ, և Եվրոպական միությունը ցանկանում է լինել այդ գործընթացի մասը։ Ֆոն դեր Լայենը ընդգծել է, որ ԵՄ-ն կխթանի ատոմային էներգետիկայի զարգացումը՝ արդյունաբերության և բնակչության համար մատչելի ու էկոլոգիապես մաքուր էներգամատակարարում ապահովելու նպատակով։

Նա նաև հայտարարել է, որ ներկայացվում է փոքր մոդուլային ռեակտորների նոր եվրոպական ռազմավարություն։ «Մեր նպատակը պարզ է՝ ցանկանում ենք, որ այս նոր տեխնոլոգիան Եվրոպայում օգտագործման համար պատրաստ լինի 2030-ականների սկզբին»,- նշել է ֆոն դեր Լայենը՝ հավելելով, որ Եվրոպան պետք է դառնա «նոր սերնդի ատոմային էներգետիկայի գլոբալ կենտրոն»։

Միևնույն ժամանակ, փաստացի «վերածնունդը» դեռ ամբողջությամբ չի նկատվում։ Ըստ World Nuclear Industry Status Report-ի՝ 2025 թվականին աշխարհում շահագործման է հանձնվել ընդամենը չորս նոր ռեակտոր՝ ընդհանուր 4.4 ԳՎտ հզորությամբ․ դրանցից երկուսը՝ Չինաստանում, մեկը՝ Հնդկաստանում և մեկը՝ Ռուսաստանում։ Միաժամանակ շահագործումից դուրս է բերվել յոթ ռեակտոր՝ ընդհանուր 2.8 ԳՎտ հզորությամբ։

Նշվում է նաև, որ ամբողջ ամերիկյան մայրցամաքում ներկայումս որևէ կոմերցիոն ատոմային ռեակտոր չի կառուցվում։ Իսկ Եվրոպական միությունում շինարարության փուլում գտնվող միակ օբյեկտը Մոխովցե-4 ատոմային ռեակտորն է Սլովակիայում, որի կառուցումը սկսվել է դեռ 1985 թվականին։

Հիշեցնենք, որ վարչապետ Նիկոլ Փաշինյանը ևս Փարիզում մասնակցում է միջուկային էներգետիկայի գագաթնաժողովին։ Փաշինյանը ելույթ էր ունեցել՝ նշելով, որ ՀՀ Կառավարությունը որդեգրել է միջուկային էներգիան որպես էներգետիկ անվտանգության էական գործոն պահպանելու քաղաքականություն։ Նրա խոսքով՝ Հայաստանը որոշում է կայացրել փոքր մոդուլային ռեակտորի տեխնոլոգիայի կիրառման վերաբերյալ։