Ֆրանսիայի և Թուրքիայի նախագահները Նյու Յորքում հանդիպմանը տարածաշրջանային հարցեր են քննարկել

ՄԱԿ-ի Գլխավոր վեհաժողովի 80-րդ նստաշրջանին մասնակցելու համար Նյու Յորքում գտնվող Թուրքիայի նախագահ Ռեջեփ Թայիփ Էրդողանը Թուրքական տանը հանդիպել է Ֆրանսիայի նախագահ Էմանուել Մակրոնի հետ։ Թուրքիայի նախագահականի հաղորդակցության վարչության հաղորդմամբ՝ հանդիպմանը քննարկվել են Թուրքիայի և Ֆրանսիայի երկկողմ հարաբերությունները, ինչպես նաև տարածաշրջանային և համաշխարհային հարցեր։

Ընդգծելով, որ Ֆրանսիայի հետ երկխոսությունը կարևոր է Թուրքիայի համար՝ Էրդողանը նշել է, որ կշարունակվեն ջանքերը բազմաթիվ, մասնավորապես, առևտրի, էներգետիկայի և պաշտպանական արդյունաբերության ոլորտներում հետագա համագործակցությունն ամրապնդելու համար։

«Նախագահ Էրդողանը շեշտել է, որ Թուրքիան վճռական է վերականգնելու և զարգացնելու իր հարաբերությունները Եվրամիության հետ, և որ անհրաժեշտ մեխանիզմների անհապաղ ակտիվացումն օգտակար կլինի։ Նշելով, որ Թուրքիան առավելագույն ջանքեր է գործադրում Ռուսաստանի և Ուկրաինայի միջև արդար և երկարատև խաղաղության հասնելու համար՝ նախագահ Էրդողանն ընդգծել է, որ Ստամբուլում ընթացող բանակցությունները պետք է ընթանան արդյունքների վրա կենտրոնացած մոտեցմամբ»,- ասվում է հաղորդագրության մեջ։

Շնորհավորելով նախագահ Մակրոնին Ֆրանսիայի կողմից Պաղեստին պետությունը ճանաչելու որոշման կապակցությամբ՝ Էրդողանն ընդգծել է, որ Իսրայելի վարչապետը Բենիամին Նեթանյահուի վարչակազմի վրա միջազգային ճնշման ուժեղացումը կարող է արդյունքներ տալ երկու պետությունների լուծման համար, և նշել այս համատեքստում Թուրքիայի և Ֆրանսիայի միջև սերտ կապը պահպանելու կարևորությունը։

Էրդողանը և Մակրոնը մտքեր են փոխանակել նաև Սիրիայում վերջին զարգացումների, ինչպես նաև Եվրոպայում այլատյացության և ատելության հողի վրա հանցագործությունների աճի վերաբերյալ։

Թարգմանությունը՝ Էմմա Չոբանյանի