12.01.2026 | 19:53
Մեկնարկում է շախմատի Հայաստանի առաջնությունը․ առաջին տուրի զույգերը հայտնի են
Ուկրաինան և Սիրիան վերականգնել են դիվանագիտական հարաբերությունները
Քաղաքականություն
25.09.2025 | 13:36
Ուկրաինան և Սիրիան դիվանագիտական հարաբերությունների վերականգնման վերաբերյալ համատեղ հայտարարություն են ստորագրել, հայտնում է ՌԲԿ Ուկրաինան։
«Մենք ուրախ ենք այս կարևոր քայլի համար և պատրաստ ենք աջակցել սիրիացի ժողովրդին կայունության ճանապարհին»,- նշել է Վլադիմիր Զելենսկին տելեգրամի իր ալիքում։
Նա հայտնել է, որ բանակցությունների ընթացքում Սիրիայի նախագահ Ահմեդ աշ-Շարաայի հետ քննարկել են համագործակցության զարգացման հեռանկարային ոլորտները, երկու երկրների անվտանգության սպառնալիքները և դրանց հակազդելու կարևորությունը։
«Պայմանավորվել ենք կառուցել փոխադարձ հարգանքի և վստահության վրա հիմնված հարաբերություններ»,- ընդգծել է Զելենսկին։
Սիրիայի նախագահի այց Ուկրաինա վերջին անգամ տեղի է ունեցել 2010 թվականի դեկտեմբերի 2-3-ը: Սիրիայի այն ժամանակվա նախագահ Բաշար Ասադին ընդունել է Ուկրաինայի նախագահ Վիկտոր Յանուկովիչը։
Բաշար Ասադի իշխանության տապալումից հետո Ուկրաինան դարձել է առաջին երկրներից մեկը, որը բարձր մակարդակի այց է կատարել Սիրիա: 2024 թվականի դեկտեմբերի 30-ին արտաքին գործերի նախարար Անդրեյ Սիբիհայի գլխավորած պատվիրակությունը մեկնել է Դամասկոս։
Հավելենք, որ Ուկրաինայի և Սիրիայի հարաբերությունները սառեցվել էին 2014 թվականին, երբ Ռուսաստանն ագրեսիա էր սկսել Ուկրաինայի դեմ Ղրիմում և Դոնբասում: Նույն թվականին Սիրիայի ներկայացուցիչները քվեարկել էին ՄԱԿ-ի կողմից Ուկրաինայի տարածքային ամբողջականությունը սատարող բանաձևի դեմ՝ ամրապնդելով իրենց կարգավիճակը որպես Ռուսաստանի դաշնակիցներ։
2016 թվականին Սիրիայում Ուկրաինայի դեսպանատունը տարհանվել է Լիբանան՝ անվտանգության նկատառումներից պատճառով, սակայն Ուկրաինայում Սիրիայի դեսպանատունը շարունակել է գործել մինչև 2018 թվականը։
Ուկրաինայի և Սիրիայի միջև դիվանագիտական հարաբերությունները պաշտոնապես խզվել են 2022 թվականին Ռուսաստանի կողմից Ուկրաինա լայնածավալ ներխուժման սկսվելուց հետո, երբ Ասադն աջակցություն էր հայտնել ՌԴ-ին։
Թարգմանությունը՝ Էմմա Չոբանյանի
