07.03.2026 | 15:09
Փետրվարի 28-ից մարտի 6-ը Իրանից Հայաստանի տարածքով 41 երկրների քաղաքացիներ են տեղափոխվել․ ՀՀ ԱԳՆ
«Իմ ղարաբաղյան քաղաքականությունը կապ չունի նրա քաղաքականության հետ»․ Լևոն Տեր-Պետրոսյանը չի ընդունում, որ Փաշինյանն իր խաղաղության օրակարգի թեզերն է կրկնում
Քաղաքականություն
24.09.2025 | 15:58
Թող հրապարակի Ղարաբաղի վերաբերյալ բոլոր փաստաթղթերը։ Լրագրողների հետ զրույցում այս մասին հայտարարել է ՀՀ առաջին նախագահ Լևոն Տեր-Պետրոսյանը՝ պատասխանելով հարցին, թե ինչո՞ւ չի ցանկանում գնալ Նիկոլ Փաշինյանի հետ բանավեճի։
Հարցին էլ՝ «եթե հրապարակի, բանավեճի կգնա՞ք», առաջին նախագահը պատասխանել է, որ եթե փաստաթղթերը հրապարակի, «վեճը վերջացած կլինի»։
Լրագրողի դիտարկմանը, որ Նիկոլ Փաշինյանը նրա հոգեզավակն է, Լևոն Տեր-Պետրոսյանը պատասխանել է, թե դա ուրիշներն են ասում, ինքն այդպիսի բան չի ասել։
Անդրադառնալով այն տեսակետին, որ Նիկոլ Փաշինյանը արցախյան խնդրի հարցում Լևոն-Տեր Պետրոսյանի թեզերն է կրկնում, վերջինն արձագանքել է՝ Փաշինյանը կործանել է այդ թեզերը։
«Դա կեղծ համեմատություն է, ոչ մի կապ չունի իմ ղարաբաղյան քաղաքականությունը նրա քաղաքականության հետ։ Այդ թեզերը նա կործանեց՝ Ստեփանակերտում հայտարարելով՝ «Արցախը Հայաստան է և վերջ», որը պատերազմ բերեց»,- ասաց Տեր-Պետրոսյանը։
Ինչ վերաբերում է հարցին, որ ինքը, կարծես, դեմ չէր 2018 թվականի իշխանափոխությանը, համենայնդեպս, չէր քննադատում Նիկոլ Փաշինյանին, Տեր-Պետրոսյանն արձագանքել է՝ հեղեղն ինչպե՞ս քննադատես։
«Դա այնպիսի մի փոթորիկ էր։ Մարդը հաջողեց։ Պետք է գնահատել․ ինչ նպատակ դրել էր, հասավ դրան»,- ասել է նա։
