Մակրոնը ողջունել է ՌԴ-ի նկատմամբ Թրամփի հռետորաբանության փոփոխությունը

Ֆրանսիայի նախագահ Էմանուել Մակրոնը ողջունել է ԱՄՆ նախագահ Դոնալդ Թրամփի՝ Ռուսաստանի նկատմամբ հռետորաբանության փոփոխությունը, գրում է DW-ի ռուսական ծառայությունը։

«Ես ուրախ եմ, որ ԱՄՆ նախագահը հավատում է Ուկրաինայի՝ ոչ միայն դիմանալու, այլև մեզ հետ միասին իր իրավունքները պաշտպանելու ունակությանը»,- ասել է Ֆրանսիայի առաջնորդը Նյու Յորքում։

Նա ողջունեել է ԱՄՆ նախագահի հայտարարությունները, որտեղ նա մատնանշել է Ռուսաստանի անհաջողություններն եւ երկրի տնտեսության թուլացումը։

«Ավելի քան 1000 օրվա ընթացքում, չնայած բազմաթիվ կորուստներին և քաղաքացիական բնակչության շրջանում բազմաթիվ զոհերին, Ռուսաստանը գրավել է Ուկրաինայի տարածքի հազիվ մեկ տոկոսը»,- հավելել է Մակրոնը։

Մինչ այս, Դոնալդ Թրամփը վստահություն էր հայտնել, որ Եվրամիության աջակցությամբ «Ուկրաինան ի վիճակի է պայքարել և վերադարձնել» իր ամբողջ տարածքը։ Սպիտակ տան ղեկավարն այս մասին գրել էր Truth Social սոցիալական ցանցում՝ Նյու Յորքում Ուկրաինայի նախագահ Վլադիմիր Զելենսկիի հետ հանդիպումից հետո։

«Ժամանակի, համբերության ու Եվրոպայի, մասնավորապես, ՆԱՏՕ-ի ֆինանսական աջակցության շնորհիվ, այս պատերազմի սկսվելուց սկզբնական սահմանների վերականգնումը լիովին հնարավոր է»,- հայտարարել է ամերիկացի առաջնորդ՝ հավելելով, որ Ռուսաստանը պատերազմ է մղում արդեն երեքուկես տարի, պատերազմ, որում իսկական ռազմական տերությանը հաղթանակի համար պետք կլիներ «մեկ շաբաթից էլ պակաս ժամանակ»։

Բացի այդ, Ֆրանսիայի ղեկավարը հայտարարել է՝ եթե ԱՄՆ նախագահ Դոնալդ Թրամփն իսկապես ցանկանում է Խաղաղության Նոբելյան մրցանակ ստանալ, ապա նա պետք է դադարեցնի պատերազմը Գազայում։ Ֆրանսիական BFM հեռուստաընկերությանը տված հարցազրույցում Մակրոնն ասել է, որ միայն Թրամփն ունի Իսրայելի վրա ճնշում գործադրելու լիազորություն՝ պատերազմը դադարեցնելու համար։

«Կա մեկ մարդ, որը  կարող է ինչ-որ բան անել դրա հետ կապված, և դա ԱՄՆ նախագահն է։ Եվ պատճառը, որ նա կարող է ավելին անել, քան մենք, այն է, որ մենք չենք մատակարարում զենք, որը թույլ է տալիս պատերազմ մղել Գազայում։ Մենք չենք մատակարարում սարքավորումներ, որոնք թույլ են տալիս պատերազմ մղել Գազայում։ Միացյալ Նահանգները դա անում են»,- ասել է Մակրոնը։

Երեքշաբթի Թրամփը ՄԱԿ-ի Գլխավոր վեհաժողովում հանդես էր եկել ծավալուն ելույթով՝ մերժելով արևմտյան դաշնակիցների կողմից Պաղեստին պետության ստեղծմանն աջակցելու քայլերը և ասելով, որ դա կլինի ՀԱՄԱՍ-ի զինյալների համար պարգև։

«Մենք պետք է անհապաղ դադարեցնենք պատերազմը Գազայում։ Մենք պետք է անհապաղ բանակցենք խաղաղության շուրջ»,- ասել էր Թրամփը։

Անդրադառնալով Թրամփի ելույթին՝ Մակրոնն ասել է. «Ես տեսնում եմ ամերիկացի նախագահի, որը ներգրավված է, որն այսօր առավոտյան ամբիոնից կրկնեց՝ «Ես խաղաղություն եմ ուզում։ Ես լուծել եմ յոթ հակամարտություն»։ Նա ցանկանում է Խաղաղության Նոբելյան  մրցանակ ստանալ։ Դա հնարավոր է միայն այն դեպքում, եթե դուք դադարեցնեք այս հակամարտությունը»։

Մի քանի երկրներ, այդ թվում՝ Իսրայելը, Պակիստանը և Կամբոջան, Թրամփին առաջադրել են Նոբելյան մրցանակի՝ խաղաղության համաձայնագրերի կամ հրադադարի կնքման միջնորդության համար։ Ինքը՝ Թրամփը, ասել է, որ արժանի է  այդ մրցանակին, որը ստացել են Սպիտակ տան նախորդ չորս ղեկավարները։

Հավելենք, որ Հայաստանը նույնպես աջակցում է Թրամփին Նոբելյան մրցանակ շնորհելուն։ Այդ մասին Վաշինգտոնում ԱՄՆ-ի ու Ադրբեջանի նախագահների եռակողմ գագաթնաժողովում հայտարարել էր ՀՀ վարչապետ Նիկոլ Փաշինյանը։

Թարգմանությունը՝ Էմմա Չոբանյանի