17.05.2026 | 23:35
Հենրիխ Մխիթարյանը՝ «Ինտեր» – «Վերոնա» հանդիպման լավագույն ֆուտբոլիստ․ ՏԵՍԱՆՅՈՒԹ
Հորդառատ անձրևները հեղեղել են Արցախում նորակառույց գյուղի տները․ փլուզումներ կան․ ՏԵՍԱՆՅՈՒԹ
22.09.2025 | 22:25
Արցախում հորդառատ անձրևները խնդիրներ են առաջացրել Աղդամի Խիդիրլի նորակառույց գյուղի բնակիչների համար։ Սոցցանցրի ադրբեջանական տիրույթում տարածվող տեսանյութերում երևում է, որ անձրևը քշել է վերջերս կառուցված ճանապարհը, քանդել տների պատերն և հեղեղել դրանք։ Բնակիչները պնդում են, որ նոր բնակավայրի շինարարությունն անորակ է կատարվել։
Այս գյուղի հիմքը դրվել է Ադրբեջանի նախագահ Իլհամ Ալիևի կողմից 2022 թվականի հոկտեմբերի 4-ին։ Այս տարվա հուլիսի 3-ին Իլհամ Ալիևը և Ղրղզստանի նախագահ Սադիր Ժապարովը մասնակցել էին Խիդիրլի գյուղի առաջին փուլի բացման արարողությանը:
Հավելենք, որ առաջին անգամ չէ, որ Արցախ տեղափոխված ադրբեջանցիները դժգոհում են նորակառույցների անորակությունից։ Նախորդ տարի էլ հորդառատ անձրևները մեծ վնասներ են հասցրել Բերձորին՝ հեղեղելով նորակառույց տները։
Ադրբեջանցի ընդդիմադիր գործիչներն ու լրատվամիջոցները պարբերաբար տեղեկություններ են հրապարակում Արցախում իրականացվող շինաշխատանքներում կոռուպցիոն սխեմաների մասին։ Արցախում շինարարական ու կառուցապատման աշխատանքներով հիմնականում զբաղվում են Ադրբեջանի նախագահ Ալիևի կնոջ՝ Մեհրիբան Ալիևայի հորը՝ Արիֆ Փաշաևին պատկանող Pasha Holding-ն ու դրա հետ կապված ընկերությունները։ Pasha Holding-ի բաժնեմասեր ունեն նաև Ալիևի դուստրերը՝ Լեյլա և Արզու Ալիևաները։ 2013 թվականից Արիֆ Փաշաևը հոլդինգի կառավարումը փոխանցել է Լեյլա և Արզու Ալիևաներին։
Ադրբեջանական աղբյուրները հայտնում են, որ Խիդիրլի գյուղում աշխատանքների համար Körpü-Bina-Tikinti ընկերության հետ կնքվել է 30 միլիոն մանաթի պայմանագիր։ Այս ընկերությունը հիմնականում հայտնի է որպես պետական մարմինների կողմից իրականացվող խոշորածավալ նախագծերի կատարող: Չնայած պաշտոնական փաստաթղթերում Խալիգ Գոյուշովը նշված է որպես ընկերության օրինական ներկայացուցիչ, հաղորդվում է, որ ընկերությունը ղեկավարում է հայտնի գործարար Խալիլ Գոյուշովը:
Թարգմանությունը՝ Էմմա Չոբանյանի
