Բերձորում հեղեղները վնասել են նորակառույց տներն ու ճանապարհները

Վերջին օրերի հորդառատ անձրևները մեծ վնասներ են հասցրել Արցախի Բերձորին։ Մասնավորապես, հորդառատ անձրևները հեղեղել են նորակառույց տները։ Համացանցում կադրեր են տարածվել, որոնցում երևում է, թե ինչպես է ջուրը լցվել տներ, նկուղներ և բակեր։ Տեսանյութերից մեկում էլ երևում է, որ տներից մեկում քանդվել է առաստաղը։ Հեղեղը քանդել է նաև վերջերս կառուցված ճանապարհները։

Վնասներից դժգոհում են Աղավնո և Սուս գյուղի բնակիչները։ Նրանք նաև հայտարարել են, որ Ադրբեջանի պաշտոնական կառույցներից օգնություն չկա։

Համացանցում տարբեր մեկնաբանություններ են հնչում, որ «այս ամենը կոռուպցիայի ամոթալի արդյունքն է»։

Հավելենք, որ Բերձորում նորակառույց տների խնդիրների մասին բնակիչները բարձրաձայնում են վաղուց։ Դեռևս մեկ տարի առաջ ադրբեջանական աղբյուրները տեղեկություններ էին հայտնում, որ բնակություն հաստատած ադրբեջանցիները սկսել են հեռանալ, իսկ շատերը հրաժարվում են պետության կառուցած տներից, քանի որ դրանք անորակ են։ Բացի այդ, այնտեղ աշխատատեղեր չկան, հողամասեր հատկացված չեն, բազմաթիվ այլ խնդիրներ կան։

Ադրբեջանցի ընդդիմադիր գործիչներն ու լրատվամիջոցները պարբերաբար են տեղեկություններ հրապարակում Արցախում իրականացվող շինաշխատանքներում կոռուպցիոն սխեմաների մասին։

Արցախում շինարարական ու կառուցապատման աշխատանքներով հիմնականում զբաղվում է Ադրբեջանի նախագահ Ալիևի կնոջ՝ Մեհրիբան Ալիևայի հորը՝ Արիֆ Փաշաևին պատկանող Pasha Holding-ն ու դրա հետ կապված ընկերությունները։  Հոլդինգի բաժնեմասեր ունեն նաև Ալիևի դուստրերը՝ Լեյլա և Արզու Ալիևաները։ 2013 թվականից Արիֆ Փաշաևը հոլդինգի կառավարումը փոխանցել է Լեյլա և Արզու Ալիևաներին։

Էմմա Չոբանյան