16.07.2026 | 13:27
Հակակոռուպցիոն 22 հանձնարարականներից Հայաստանը «բավարար չափով» կատարել է միայն 6-ը․ ԳՐԵԿՈ-ն նոր զեկույց է հրապարակել
ՄԱԿ-ի Անվտանգության խորհուրդը որոշել է վերականգնել Իրանի դեմ պատժամիջոցները
Քաղաքականություն
20.09.2025 | 12:08
ՄԱԿ-ի Անվտանգության խորհուրդը որոշել է վերականգնել Իրանի դեմ 2015 թվականի միջուկային համաձայնագրից հետո կասեցված պատժամիջոցները․ գրում է BBC-ի ռուսական ծառայությունը։
Մեծ Բրիտանիան, Ֆրանսիան և Գերմանիան մեղադրեցին Իրանին հիմնական համաձայնագիրը խախտելու մեջ, որը երաշխավորում է, որ Իրանը երբեք չի ձգտի, ձեռք չի բերի կամ չի մշակի միջուկային զենք։ Նրանց աջակցեցին վեց այլ երկրներ, այդ թվում՝ ԱՄՆ-ն, մինչդեռ Չինաստանը, Պակիստանը և Ռուսաստանը քվեարկեցին պատժամիջոցների կասեցումը երկարաձգելու օգտին։
Հետևաբար, պատժամիջոցները կրկին կկիրառվեն հաջորդ շաբաթ՝ սեպտեմբերի 26-ին, եթե Իրանը և եվրոպական առաջնորդները մինչ այդ համաձայնության չգան։
«Առանց ամենահիմնական պայմանների կատարման, արագ դիվանագիտական լուծման հստակ ուղի չկա։ Մենք ցավում ենք, որ Իրանը դեռևս անհրաժեշտ քայլեր չի ձեռնարկել և կոչ ենք անում նրան անհապաղ գործել», – Reuters-ին ասել է ՄԱԿ-ում Մեծ Բրիտանիայի դեսպան Բարբարա Վուդվորդը։
2015 թվականի միջուկային համաձայնագիրը՝ Համատեղ համապարփակ գործողությունների ծրագիրը (JCPOA), կնքվել է Իրանի և հինգ համաշխարհային տերությունների միջև գրեթե երեք տարի տևած բանակցություններից հետո, հաճախ՝ ամենաբարձր մակարդակներում։ Իրանը դուրս եկավ համաձայնագրից 2019 թվականին՝ ի պատասխան նախորդ տարի Դոնալդ Թրամփի առաջին պաշտոնավարման ընթացքում ԱՄՆ-ի միակողմանի դուրս գալուն։
Ավելի վաղ տեղեկացրել էինք, որ Մեծ Բրիտանիան, Ֆրանսիան և Գերմանիան սկսել են Իրանի նկատմամբ ՄԱԿ-ի հիմնական պատժամիջոցների վերականգնման գործընթացը, որոնք վերացվել էին 2015 թվականի համաձայնագրով, քանի որ Թեհրանի միջուկային ծրագրի շուրջ լարվածությունը կրկին սրվում է։
Թարգմանությունը՝ Անահիտ Խաչատրյանի
